ВЛАДАТА ВО КИЕВ ЈА ПОЧНА ВОЈНАТА Путин пред светот повтори дека Русија ќе ги постигне своите цели

Првата тема на годишната медиумска конференција на рускиот претседател Владимир Путин, на која му поставуваат прашања новинари и граѓани на Русија, беше војната во Украина.

Првото прашање го постави модераторот на конференцијата, за војната во Украина и како Русија ќе ги постигне својите цели. Путин го обвини Киев за продолжувањето на војната, велејќи дека „тие фундаментално одбиваат мирно да го завршат овој конфликт“.

За војната во Украина

– Кога сè достигна пресвртна точка во 2022 година, кога режимот во Киев почна војна во Донбас, Русија нагласи дека ќе биде принудена да ги признае  Луганска Народна Република и Донецка Народна Република. Сè почна со државниот удар во Украина – рече Путин.

 

Во врска со ситуацијата на фронтот, Путин рече дека повеќе од половина од украинските населби се под контрола на руски војници.

– Откако украинската армија беше протерана од територијата на Курската област, целата иницијатива на фронтот е во рацете на руската армија – рече Путин.

Рускиот лидер продолжи да зборува за ситуацијата на фронтот, споменувајќи го заземањето на украинскиот град Севирск и отворајќи ја можноста за заземање на други украински градови.

– Тоа е важна населба и овозможува пенетрација во утврдениот дел од Украина – рече тој, осврнувајќи се на појасот од тврдински градови, меѓу кои се Краматорск, Славјанск и Константиновка.

– Красни Лиман наскоро ќе биде ослободен. Славјанск, Краматорск и Константиновка во моментов се главните упоришта на Украина – рече рускиот претседател.

Тој додаде дека руските сили контролираат 50 проценти од Константиновка и Красној Лиман, како и од Гуљапоље.

Киев ја почна војната

Во политички контекст, Путин ја повтори тезата дека владата во Киев ја почнала војната на истокот од Украина, тврдејќи дека на жителите на тој дел од земјата не им е дозволено сами да одлучуваат за својот начин на живот.

Путин додаде дека Украина во моментов не е подготвена за сериозни мировни преговори, иако, како што наведе, постојат одредени сигнали што укажуваат на можност за некаков вид дијалог.

Тој нагласи дека Русија е подготвена мирно да го заврши конфликтот, но само врз основа на принципите што претходно ги изнесе и кои, според него, би ги отстраниле фундаменталните причини за војната.

За Купјанс и за Зеленски

Пред една недела, украинскиот претседател Володимир Зеленски сними видео пред знакот на градот Купјанск, негирајќи дека Русија го зазела градот во Харковската област. Новинарот кој му го постави прашањето на Путин го нарече видеото „лажно“.

– Тој е уметник, и тоа доста талентиран. Го кажувам тоа без никаква иронија – рече рускиот претседател.

Путин нагласи дека не ги следи таквите работи и додаде дека знакот со името на градот се наоѓа на еден километар од Купјанск.

– Зошто стоите на прагот? Влезете внатре – му порача Путин на Зеленски.

Тој додаде дека Купјанск е под контрола на руската армија и дека околу 3.500 украински војници се опкружени околу градот.

– Тие немаат шанси – нагласи тој, иако воените мапи од фронтот покажуваат поинаку.

Според него, руската армија сега спроведува операции за освојување на местото Купјанск-Узлово, каде што има околу 15 украински батаљони, кои се опкружени и не добиле наредба да се повлечат.

За замрзнатите руски средства и договорот постигнат во Брисел

Путин ја критикуваше ЕУ за нејзиниот притисок да користи замрзнати руски средства за финансирање на Украина, велејќи дека „кражбата не е многу добра дефиниција за ова“.

– Кражбата е (во) тајност… тука ова се прави јавно. Тоа е провала… последиците се многу сериозни за провалниците – рече тој.

Тој додаде дека ќе биде „многу тешко“ за земјите од ЕУ кои додаваат дополнителни оптоварувања во своите буџети преку заеми за Украина.

– Конфискацијата на руски имот во Европа ќе ја поткопа довербата во Еврозоната, бидејќи откако ќе почне, нема враќање назад – рече Путин.

Рускиот лидер тврди дека финансиите на неговата земја се во подобра состојба од оние на Франција во однос на националниот долг.

– Русија ќе се брани на судовите, во јурисдикција која не зависи од политички одлуки – додава Путин.

Тој рече дека порано или подоцна Европа ќе мора да го врати она што го украла од рускиот имот.

Картата зад Путин јасна порака до светот

На сценографијата зад Путин е поставена карта на Руската Федерација, каде освен Крим, се и четирите источни украински региони – Донецк, Луганск, Запорожје и Херсон, кои Русија ги смета за дел од руската држава.

 

Руските сили сè уште не ги освоиле тие територии во целост, но нивното нагласување во позадината е јасен сигнал од Кремљ дека Москва нема да се откаже од своите територијални барања за мировниот договор со Украина.

Токму прашањето за териториите е најголемата пречка во преговорите за евентуален мировен договор,затоа што Киев е категоричен дека нема да отстапи територии на Москва, а Русија не покажува никаква подготвеност за компромис на оваа тема.

За руската армија

Путин изјави дека повеќе од 400.000 луѓе потпишале договор со руската армија оваа година. Тој нагласи дека особено голем број луѓе аплицираат за беспилотни воздухопловни единици.

– Русија е лидер во областа на беспилотните летала и во однос на бројот на беспилотни летала е далеку пред своите противници – рече рускиот претседател.

Испратени речиси 3 милиони прашања

Бројот на прашања испратени за директната линија со рускиот лидер надмина 2,5 милиони четири часа пред емитувањето на програмата.

Собирањето прашања за овој настан, кој секогаш е од голем интерес и за граѓаните и за медиумите, почна на 4 декември и ќе продолжи до крајот на прес-конференцијата.

Оваа година, како и во 2024 година, GigaChat ги транскрибира прашањата за директната линија.

Портпаролот на Кремљ, Дмитриј Песков, претходно изјави дека Москва е заинтересирана целиот свет да чуе што зборува рускиот претседател.

Oва е 22-рa годишната прес-конференција на Путин.