СРПСКАТА РАФИНЕРИЈА „НИС“ ПРЕД ЗАТВОРАЊЕ Вучиќ алармира дека претстои застој на целокупното стопанството

Сè уште имаме 4 дена до целосно затворање на рафинеријата во Панчево доколку лиценцата не биде одобрена од OFAK, односно од владата на САД, објави српскиот претседател Александар Вучиќ.

Вучиќ изјави дека рафинеријата NIS е во технолошки процес на топла циркулација, еден вид тивка работа, дека сè уште не е затворена и исклучена.

– Се соочуваме со големи проблеми. Би сакал да ве известам дека рафинеријата НИС е во технолошки процес на таканаречена топла циркулација, односно тивка работа. Сè уште не е затворена и исклучена, но тоа е веќе понизок режим на работа во споредба со вообичаениот. Имаме уште 4 дена до целосно исклучување на рафинеријата, доколку лиценцата не биде одобрена од американската влада – рече Вучиќ во вонредното обраќање.

Тој рече дека сè уште има работи што САД сакаат да ги видат и разгледаат и евентуално да дадат потврда за лиценцата за 45 до 60 дена.

Вучиќ подвлече дека рафинеријата целосно ќе запре в четврток доколку не добие лиценца за работа.

-Денес или утре можеби ќе можеме да промениме нешто, но ако дојде до четврток, рафинеријата ќе престане. Последиците од тоа се дека ќе бидат потребни 14 дена за рестартирање на рафинеријата, ако не и повеќе од 20 дена. До Нова Година, рафинеријата нема да работи. Денес, прашањето не е ставот на Србија, туку ставот на другите кои се спротивставуваат едни на други. Нашата позиција станува сè потешка – рече Вучиќ.

Тој рече дека последици ќе има врз целокупното српско стопанство доколку се реализираат заканите на САД за санкции на Народна банка за соработката со НИС.

– Исто така, постои закана за трговијата и трговските синџири. Ова би влијаело и на производството на електрична енергија… Исто така, би го загрозило функционирањето на топланите, општата безбедност, неизбежноста на зголемувањето на цените на горивата. Мора да се земе предвид дека НИС е најголемиот трговец на големо – рече Вучиќ.