ЗДРАВЈЕТО НА ДЕЦАТА КОИ ИГРАЛЕ СО ШПРИЦ НЕ Е ЗАГРОЗЕНО Општина Центар даде детали за случајот кој ја разбранува јавноста
По кажувањата на детето, инволвирани во играта со шприцот биле уште три-четири деца, од кои само едно дете имало гребнатинка која може да е и од некоја гранка од оградата. Децата се проверени од лекар и родителите велат дека се во добра здравствена состојба. За време на инцидентот имало учителки во дворот, а шприцот најверојатно бил фрлен преку оградата каде се играле децата, се вели во соопштението на Општина Центар.
Здравјето на децата кои играле со игла од шприц не е загрозено и градинката веднаш презела мерки, велат од Општина Центар во врска со случајот со најдениот наркомански шприц во градинката во скопски Буњаковец кој одекна во јавноста.
Во продолжение ја пренесуваме целата реакција на Општината:
„Во однос на информациите кои излегоа во јавноста дека деца во градинка во Центар пронашле искористен шприц, Градинката ’13 Ноември’ информира дека детето го извадило шприцот без игла од џебот откако се вратило дома, а потоа откако поминал празникот, по три дена родителите ја алармирале градинката.
Двајцата родители имале состанок со директорката. По кажувањата на детето, инволвирани во играта со шприцот биле уште три-четири деца, од кои само едно дете имало гребнатинка која може да е и од некоја гранка од оградата. Децата се проверени од лекар и родителите велат дека се во добра здравствена состојба. За време на инцидентот имало учителки во дворот, а шприцот најверојатно бил фрлен преку оградата каде се играле децата.
Дополнително, минатиот вторник на 9 септември менаџментот на градинката одржа средба со претставник на групата родители. Донесени беа неколку заклучоци:
– Патролното обезбедување да врши почеста контрола на територијата каде се наоѓа градинката, да биде засилен надзорот и хигиената во дворот во утринските часови и покрај секојдневното чистење и полевање на дворот.
– Со децата да се разговара за потенцијалните опасности по нивното здравје во однос на предмети кои не им се познати.
Заклучоци од состанокот:
1. Градинката има патролно обезбедување SGS (да се зголеми надзорот и контролата над објектот и дворот по настанот секојдневно).
2. Секое утро проверување и чистење/миење на дворот пред децата да излезат (особено во дел каде децата гравитираат).
3. Секое утро пред децата да излезат разговор со нив за опасности кои постојат и што не смее да се прави надвор и што треба да се пријави кај учителките.
4. Надвор да има исклучиво организирана игра (да не се оставени сами да смислуваат игра). Учителките да се креатори на играта смислена со цел учење и надзор.
5. Поголема хигиена (задолжително проверување на џебови, миење раце и пресоблекување по влегување внатре/спиење)“.
Претходно, медиумите ја пренесоа веста за случајот која ја објави порталот А1он. Родител тврдел дека од градинката им било кажано да молчат и да не говорат во јавноста за случајот, и дека ќе го решеле случајот.
Дел од родителите на децата од градинката се револтирани дека не се обрнувало внимание на нивните деца додека се пуштаат надвор во дворот, а дел барале во вечерните часови да се контролира кој влегува во дворот на градинката и какви активности се одвиваат.
„И од фотографијата на шприцот видливо е дека е употребуван, најверојатно од некој зависник на дрога. Вистинска паника настанала кога не се знаело дали имало или немало игла на шприцот и кој сè од децата го чепкал шприцот“, се вели во текстот на А1он кој ја разбранува јавноста.