АКО ГО ЦЕНИМЕ МАКЕДОНСКИОТ ПРОИЗВОД, ДРУГИТЕ ЌЕ НЀ ЦЕНАТ НАС Мицкоски очекува кампањата „Македонско најдобро“ да ја поттикне индустријата

Премиерот Христијан Мицкоски очекува преку кампањата  „Македонско најдобро” да се поттикне домашното производство со помош на граѓаните, а резултатите ќе бидат покрај другото и во тоа што и другите ќе го ценат тоа.

Тој кампањата ја смета за патриотска, а македонските производи, вели, се најдобри.

– Сакаме на граѓаните да им кажеме дека македонското е најдобро. И сите да се ориентираме кон македонското. Сите да си се посветиме на македонските езера, на македонските планини, на македонските села, на македонското вино, сирење, кашкавал, месо, преубави се и сè останато. Еве да се обидеме сите тоа да го правиме и да видите како сè ќе биде поинаку и другите повеќе ќе нè ценат – рече Мицкоски.

Тој  појасни дека целта на кампањата е да се поттикне македонското производство, посебно преработувачката индустрија.

– Јас сум многу среќен, што главен двигател на растот на индустриското производство, понатаму и на домашното производство е токму растот на преработувачката индустрија – рече тој.