АНТОАНЕТА ДИМОВСКА ОД СУДСКИОТ СОВЕТ НЕ СЕ ПОВЛЕКУВА ОД УО НА АКАДЕМИЈАТА ЗА СУДИИ Немам судир на интереси со членството во Управниот одбор

Судијката Антоанета Димовска на денешната седница на Судскиот совет рече дека не размислува да се повлече и да даде оставка од членството во Управниот одбор на Академијата за судии и јавни обвинители по дописот од Антикорупциската комисија за судир на интереси, бидејќи смета дека не е повреден законот и нема судир на интереси.

– Доколку имав судир на интереси, доколку имаше забрана за мое членување, овде може да дискутираме дали сум јас судија или не. Јас сум судија, но во мирување, а никаде во законот нема забрана дека судија кому му е во мирување функцијата не може да биде член на УО на Академијата. Досегашната праксаво УО  да членуваат судии кои биле членови на Судскиот совет тоа го потврдува. Принципиелно не се повлекувам, затоа што одговорно тврдам пред јавноста дека немам никаков судир на интереси. Можеби таму има некои членови кои имаат судир на интереси, тоа е нивна работа. Немам дете кое ми е во Академијата, нема никаква причина да не бидам член. Судија сум и за разлика од членовите кои што не се судии, мојот мандат во ова тело ќе престане во оној момент кога ќе направам 64 години возраст, ако дотогаш е актуелен овој закон – рече Димовска.

Таа одговорот го даде на прашање од членот на Судскиот совет Селим Адеми дали размислува да се повлече и да даде оставка од Управниот одбор на Академијата, по дописот од ДКСК, откако претходно оставка од УО во Академијата даде Ханиф Зендели.

Според Димовска, тоа што Зендели се повлечол е негова лична одлука, но, како што рече, не треба да навлегуваат во нејзините причини, затоа што не го прекршила законот.

– Доколку сметате дека треба да ме отповикате, тоа е ваше право. Доколку сметате дека треба да сум отповикана, ставете ја како точка на дневен ред, но јас лично сметам и тврдам дека нема причина – рече Димовска.

Судијата Александар Камбовски рече дека очекувал двајцата членови од Судскиот совет да се повлечат од УО на Академијата. Според него, не станува збор за прекршување или за судир на интереси, оти тоа го констатирале.

– Но, со повлекувањето само на едниот член ќе се испрати порака за неединственост во Судскиот совет, односно дека некои членови сметаат дека постои прекршување или судир на интереси, а други дека не постои – рече Камбовски.

Правничката Весна Дамева рече дека оставката на Зендели била прифатена на минатата седница била прифатена и  таа се смета за личен чин и дека не е поради незаконитост.