РАСТЕ ИНТЕРЕСОТ ЗА ИНВЕСТИРАЊЕ ВО ЕНЕРГИЈА ОД ОБНОВЛИВИ ИЗВОРИ За шест месеци се издадени лиценци за инсталирана моќ од 179 MW
За две години и седум месеци во земјава се изградени и приклучени на мрежа капацитети што произведуваат струја од сонце со вкупна инсталирана моќност од околу 731 MW.
Од јануари до јули годинава издадени се лиценци за производство на електрична енергија од обновливи извори со вкупна инсталирана моќност од 179,72 MW – покажуваат податоците на Регулаторната комисија за енергетика (РКЕ).
– Пониски сметки за електрична енергија е клучната причина зошто интересот за инвестиции во обновливи избори не запира. Помалите трошоци за струја несомнено е директниот бенефит што го имаат компаниите, ако анализираме на микро ниво. Но ако се гледа големата слика, токму поради овој отворен инвестициски циклус на приватната иницијатива во обновливи извори, попознат во јавноста како Елдорадо, државата забележа историски намален нето увоз на струја од традиционалните 30% на 2,75% во 2023 година – изјави претседателот на РКЕ Марко Бислимоски.
Според податоците на РКЕ, за две години и седум месеци во земјава се изградени и приклучени на мрежа капацитети што произведуваат струја од сонце со вкупна инсталирана моќност од околу 731 MW.
Инаку во 2023 година РКЕ издаде лиценци за производство на електрична енергија од обновливи извори со вкупна инсталирана моќност од скоро 399 MW, додека во 2022 година се издадени 152,2 MW.