НАТО ДА РАСПОРЕДИ ТРУПИ ЗА ДА НЕ СЕ ОТЦЕПИ РЕПУБЛИКА СРПСКА!? Барање од висок босански функционер

НАТО да распореди војници во самоуправната административна единица на округот Брчко во североисточниот дел на земјата и со тоа да ги оневозможи плановите на босанските Срби за отцепување – побара вчера претседателот на Претставничкиот дом на Босна и Херцеговина Денис Звиздиќ.

„Таквата одлука ќе го спречи, а потоа и трајно ќе го оневозможи проектот за отцепување што го започна Националното собрание на Република Српска (РС), еден од двата ентитета на Босна и Херцеговина“, напиша Звиздиќ на својот профил на социјалните мрежи во пресрет на самитот на воената алијанса во главниот град на Литванија, Вилнус на 11 и 12 јули.

Звиздиќ рече дека стационирањето на војници на НАТО во областа ќе ја елиминира една од најголемите опасности со кои се соочува Босна и Херцеговина.

Босна во април побара зголемување на бројот на војници во Силите на Европската унија – Операција Алтеа (ЕУФОР Алтеа), мировната мисија на ЕУ во земјата.

Операцијата Алтеа е воено распоредување во Босна и Херцеговина, која беше формирана во 2004 година за да го надгледува военото спроведување на Дејтонскиот мировен договор и да ја гарантира безбедноста во земјата.

Република Српска на крајот на јуни усвои закон со кој се поништува валидноста на одлуките на Уставниот суд на Босна и Херцеговина. Претседателот на РС Милорад Додик рече дека оваа одлука ќе биде основа на независноста на Република Српска. Уставниот суд го сочинуваат тројца бошњачки, тројца српски и тројца хрватски судии.

Меѓународно назначениот висок претставник Кристијан Шмит ги поништи одлуките донесени од ентитетот и изјави дека тие не можат да стапат во сила. Собранието на ентитетот, сепак, одлучи да не објавува никакви одлуки донесени од Шмит во својот официјален весник, бидејќи смета дека неговиот мандат е истечен.