ГРАЃАНИТЕ НА РЕФЕРЕНДУМ ДА СЕ ИЗЈАСНАТ ЗА УСТАВНИТЕ ПРОМЕНИ Павле Трајанов вели дека СДСМ за ова нема поддршка од граѓаните
Во гостување на Сител, лидерот на Демократски сојуз изјави дека „процесот на дуизација, криминализација и дезинтеграција ги разнишаа темелите на Македонија’
„Процесот на дуизација, криминализација и дезинтеграција, ги разнишаа темелите на Македонија, СДСМ и ДУИ ја вовлекоа Македонија во криза“, изјави Павле Трајанов, претседател на Демократскиот сојуз, во гостувањето на ТВ Сител.
Од 15 јули 2022 година топ-тема се уставните промени, а досега не видовме ниту амандмани, ниту анализа што би значеле истите, рече Трајанов, нагласувајќи дека СДСМ го влече овој процес за да остане подолго на власт, знаејќи дека нема поддршка од граѓаните, но и од партиите.
Трајанов сугерираше да се инсистира на реципроцитет, Бугарија да направи мал чекор, со признавање на правата на Македонците во Бугарија, со што ќе се отворат можности за вградување на Бугарите во Уставот.
Лидерот на Демократскиот сојуз предложи за уставните промени да се оди на референдум, но подобро е да се оди наесен на парламентарни избори.
Во врска со предложените измени во девет закони за „Бехтел и Енка“, Трајанов предложи да не се носат во скратена постапка. Тој не е подготвен да ги поддржи без поширока експертска расправа, особено што за целиот процес, како што вели, „има сериозни индикации за корупција“.