Ќе почекаме за воз до Бељаковце, парите ќе одат за друга намена

Ниското ниво на капиталните инвестиции во Министерството за транспорт и врски се должи на застојот во изградбата на железничката делница Куманово – Бељаковце од пругата кон Бугарија и дел од средствата ќе бидат повлечени со ребалансот на Буџетот, а кај другите проекти има добра реалзиација, изјави денеска министерот за транспорт и врски Благој Бочварски.

Тој истакна дека за проектот за пругата Куманово – Бељаковце треба сериозна анализа и посочи дека највереројатно ќе се оди со нова постапка поради спорот со изведувачот кој ги сопре активностите на терен.

-При изборот на нов изведувач очекуваме веќе да не ни се јавуват вакви проблеми на трасата. Тоа е делница на која се работи 25 години, нешто што е недозволиво и ако сакаме да бидеме држава која ќе биде пример за реализација на капитални инвестиции ова не смееме ова да го дозволиме – рече Бочварски.

Доизградбата на пругата од Куманово до Бељаковце е во приоритетите за работа што ги претстави денеска во кои е предвидено и да започнат и со втората и третата фаза од железничкото поврзување со Република Бугарија, како најголем инфраструктурен проект, како и да ја пуштат во сообраќај новата пруга од Битола до Кременица.

Бочварски на прес-конференцијата потврди дека кај автопатот Скопје – Блаце има ниско ниво на експропријацијата, но, како што рече, изведувачот е воведен во работа, му течат роковите и може да почне да работи согласно законите, а експропријацијата да се случи понатаму бидејќи е објект од јавен интерес.

Тој најави дека ќе продолжат со поинтензивна изградба на автопатот Кичево – Охрид, како и дека во овој мандат целосно ќе го реконструираат патниот правец од Струга до граничниот премин Ќафасан и ќе почнат постапка за проширување на автопатот од Тетово до Гостивар.

-. Понатаму, продолжуваме да ги градиме експресните патишта: втората фаза од Штип – Радовиш, втората делница од Штип – Кочани, Ранковце – Крива Паланка и Градско – Прилеп. Започнуваме со изработка на проектна задача за Автопат Прилеп-Битола. Во овој мандат ќе работиме на започнуваме со изградба и на нови два експресни патишта: Смоквица – Струмица – Ново Село, како и Битола – граничен премин Меџитлија со обиколница Битола – рече Бочварски.

Се обврзуваме, рече, да спроведеме рехабилитација на преку 1.000 километри магистрална и регионална патна мрежа.