Пратениците ја сефтосаа новата сала и ја избраа Шахпаска за претседателка на Верификациската комисија

Со интонирање на химната почна првата седница на новиот парламентарен состав која се одржува во салата Голема купола поради заштита од ширење на ковид-19. Со седницата претседава претседателот на Собранието во заминување Талат Џафери. Пратениците гласаат со картончиња, затоа што во новата сала нема електронски систем за гласање.

Според предвидените точки на дневиот ред на седницата ќе се изврши избор на претседател и членови на Верификациската комисија на Собранието, а потоа ќе следи верификација на мандатите на пратениците. За претседателка на Верификациската комисија е избрана пратеничката Јагода Шахпаска, а за членови пратениците Изет Меџити, Благица Ласовска, Соња Мираковска и Сафије Садики Шахини. Гласаа 117 пратеници, од кои „за“ 115 пратеници, „против“ немаше, а „воздржани“ беа двајца пратеници. По ова Џафери даде пауза од половина час.

На денешната седница се очекува да  се избере и претседател, заменик на претседателот, членови и нивни заменици на Комисијата за прашања на изборите и именувањата на Собранието.

Во Уставот е предвидено претседателот на државата во рок од десет дена од конституирањето на Собранието мандатот за состав на владата да го довери на кандидат на партијата, односно партиите што имаат мнозинство во парламентот. Мандатарот во рок од 20 дена од денот на доверувањето на мандатот, на Собранието му поднесува програма и го предлага составот на Владата. Владата, на предлог на мандатарот и врз основа на програмата, ја избира Собранието со мнозинство гласови од вкупниот број пратеници.

Претседателот Стево Пендаровски веќе најави дека планира да одржи консултации со политичките партии по конституирањето на парламентот.