Нова кредитна линија за помош на компаниите погодени од коронавирусот

На денешната прес-конференција министерката за финансии Нина Ангеловска заедно со директорот на Развојната банка на Република Северна Македонија Кире Наумов и директорката на Централниот регистар Марија Бошковска Јанковски ја презентираа „ковид-2“ новата кредитна линија за бескаматни кредити преку Развојната банка во вредност од 8 милиони евра.

Министерката Ангеловска најави дека веќе од среда (29 април) микро, малите и средните компании од сите дејности погодени од ковид-19 кризата ќе можат да аплицираат за „ковид-2“ линијата за бескаматни кредити во износ од 8 милиони евра.

– Ова ќе биде значајна помош, особено за микро и малите компании. Линијата „ковид-2“ нуди поголема вкупна сума од линијата „ковид-1“, но и поголем износ на поединечни кредити, а она што е важно таа ги опфаќа сите дејности погодени од кризата и има олеснети услови и олеснет начин за аплицирање. Овие средства се наменети за зачување на работните места и за заштита на ликвидноста на микро, малите и средните претпријатија – изјави Ангеловска.

Средствата за овие кредити се обезбедени преку компензационите фондови од Јапонија. Нашите земји традиционално имаат добри односи, поради тоа што и досега сме имале поддршка од оваа земја.

Ангеловска потенцираше дека оваа линија следи по првата која беше во износ од 5,7 милиони евра и беше наменета за секторите туризам, транспорт и угостителство. Досега за линијата „ковид-1“ имало исклучително голем интерес, а одобрени се апликациите на 254 компании во износ од 2,2 милиони евра во кои работат околу 3.000 лица.

– Интересот за бескаматни кредити е многу поголем, па линијата „ковид-2“ доаѓа во вистинско време. Оваа линија е наменета за сите дејности. Максималниот износ во оваа линија изнесува 90.000 евра и за трипати повисок во однос на првата кредитна линија, додека минималниот износ останува 3.000 евра – додаде Ангеловска.

Јапонската амбасадорка во земјава Кеико Ханеда во видео обраќање изрази поддршка за мерките што ги презема Владата и надеж дека тие ќе им помогнат на компаниите да продолжат да работат и да се сочуваат работните места.

– Сите земји се борат против коронаворусот и во овие тешки времиња треа заедно да работиме и д се подржуваме. Мило ми е што уште еднаш можеме да го потврдиме цврстото пријателство меѓу Северна Македонија и Јапонија, порача Ханеда.

За првиот повик „Ковид 1“ досега се одобрени средства за 254 компании со околу три илјади вработени во вкупен износ од 2,2 милиони евра.

Вкупниот износ на средства што им се даваат на располагање на компаниите со двата повика изнесува 13,7 милиони евра.  Покрај ова, компаниите имаат на располагање и околу 50 милиони евра преку комерцијалните банки.

Директорот на Развојната банка Кире Наумов изјави дека аплицирањето ќе почне на 29 април во среда и додаде дека ќе биде исклучиво електронски.

-Компаниите до 5 вработени ќе можат да аплицираат за кредит од 3.000 евра, а компаниите кои имаат од 128 до 250 вработени максимум можат да добијат 90.000 евра. Единствениот услов кој ќе треба да го исполнат компаниите е да имаат намалување на приходите за 30 отсто споредено со истиот месец во 2019, или пак со вкупниот месечен приход од 2019 година – истакна Наумов.

Вкупно од двете кредитни линии на компаниите им стојат на располагање 13,7 милиони евра. Досега за кредитната линија „Ковид 1“ аплицирале 254 компании со вкупно 3.000 вработени кои искористиле 2,2 милиони евра.

Во соработка со Централниот регистар договорено е потребните документи од оваа институција да се издаваат бесплатно.

– Следејќи ги препораките и уредбите на Владата, Централниот регистар и Развојната банка склучија договор за интернет дистрибутивен систем за потребите на огласот Ковид 2 со цел да им се помогне на микро, малите и средни претпријатија кои планираат да аплицираат за двтората кредитна линија. Со овој договор, Централниот регистар ќе ги дава бесплатно документите што им се потребни на кредитобарателите – посочи директорката на Централниот регистар Марија Бошковска-Јанковски.