ТРАМП ПРАЌА ВОЈСКА ВО ПАНАМА Привременото распоредување во џунглата може да стане трајно?

Претседателот на САД Доналд Трамп испраќа стотици војници во Панама, во рамките на проширувањето на воената кампања против нарко-картелите во Латинска Америка.

Според „Њујорк тајмс“, кој се повикува на американски воени претставници, распоредувањето е дел од поширока стратегија на Пентагон за проширување на операциите против трговците со дрога, од морето кон копното.

Весникот пишува дека првите единици од баталјон со 600 припадници на елитната 10-та планинска дивизија веќе тргнале кон панамската џунгла. Американски претставници признаваат дека привремените распоредувања би можеле да прераснат во трајно воено присуство.

Војниците, кои доаѓаат од базата Форт Драм во сојузната држава Њујорк, прво ќе поминат обука во џунглата во Панама. Потоа дел од нив ќе заминат во Колумбија, каде што кон крајот на месецот ќе учествуваат во воената вежба „Јужна авангарда“, додека други единици ќе бидат распоредени во Хондурас.

Американските сили ќе обучуваат локални војници, но нивната улога би можела да биде и значително поширока. Дел од припадниците би обезбедувале американски хеликоптери што ги поддржуваат специјалните сили, а би можеле и да интервенираат доколку американските советници се најдат во опасност за време на операции против нарко-картелите.

Токму оваа можност предизвикува загриженост во Вашингтон. Некои високи американски функционери стравуваат дека администрацијата на Трамп нема јасно дефинирана крајна цел, ниту стратегија за повлекување, што би можело да ги вовлече САД во нов вооружен конфликт.

Распоредување како за итни случаи

Размерите на операцијата се невообичаени за регионот.

Адам Исаксон, директор за надзор на одбраната во Вашингтонската канцеларија за Латинска Америка, изјавил дека не памети слично американско распоредување во регионот.

– Не можам да се сетам на американско распоредување во регионот што некогаш се приближило до 600 војници, освен во итни случаи како инвазии или природни катастрофи – оценил Исаксон.

Пентагон истовремено префрлил неколку беспилотни летала „MQ-9 рипер“ од Африка во Колумбија и Еквадор, а неколку стотици припадници на 10-та планинска дивизија се очекува да бидат ангажирани и во новата команда за операции на Западната хемисфера, со седиште во Мајами.

Американскиот министер за одбрана Пит Хегсет неодамна формирал и посебна канцеларија за надзор на операциите против картелите. За нејзината работа одобрил 20 милиони долари, а ќе ја предводи пензионираниот генерал Едвард М. Ридер Помладиот.

Администрацијата на Трамп веќе создала коалиција од 19 регионални партнери за борба против нарко-картелите. Сепак, само дел од земјите, меѓу кои Колумбија и Хондурас, се согласиле на заеднички операции на своја територија.

Од војна против дрогата до борба за влијание со Кина

Зад американското воено засилување се наѕира и поширока геополитичка цел.

Командантот на американските копнени сили за Западната хемисфера, генерал Џозеф А. Рајан, отворено признал дека Вашингтон настојува да го врати влијанието што го изгубил во Латинска Америка.

– Ја отстапивме економската доминација во регионот на противник, Кина, и тоа е факт. Сега се бориме да го вратиме копното – морето и копното, човечкото и когнитивното – од кое во многу случаи претходно се откажавме – изјавил Рајан.

Новата американска стратегија предизвикува стравувања и поради досегашниот тек на воената кампања.

Според податоците наведени во извештајот, во 71 американски напад врз бродови во Карибите и источниот Пацифик загинале најмалку 239 лица обвинети за шверц со дрога.

Правни експерти ја оспоруваат законитоста на таквите напади, предупредувајќи дека осомничените шверцери не можат автоматски да се третираат како легитимни воени цели. Преминувањето кон копнени операции дополнително го зголемува ризикот од цивилни жртви и уништување инфраструктура.

Истовремено, американската војска е силно ангажирана во војната против Иран, што создава дополнителен притисок врз расположливите авиони, беспилотни летала и резервите муниција.

Јужната команда на САД одбила да ги коментира конкретните распоредувања, но соопштила дека Пентагон останува посветен на соработката со регионалните партнери и одржувањето притисок врз криминалните мрежи.

Засега американските војници се испраќаат на привремени мисии за обука и поддршка. Сепак, можноста нивното присуство да стане трајно.

Интересно е што повеќе медиуми во Панама пренесоа дека американската амбасада во Панама ја демантирала веста дека 600 американски војници се во земјата велејќи дека се работи за 120 војници кои се на привремена воена вежба.

Сепак, таква потврда нема на официјалната веб-страница на амбасадата.