ПО ЕЗЕРОТО, РЕКА ГО КРЕНА АЛАРМОТ ВО НЕПАЛ Нов страв од поплави по катастрофата со 567 жртви

Нова опасност се појави во Непал додека земјата сè уште се справува со последиците од катастрофалните поплави. По тревогата поради езерото зад природната брана, сега повторно расте водостојот на реката Боте Коши.

Властите издадоа ново предупредување за опасност од поплави. Жителите долж реката Тришули до Маглинг треба да останат на безбедни места.

„Повторно е зголемен водостојот на реката Боте Коши, а на жителите по должината на реката Тришули до Маглинг им се препорачува да останат на безбедни места и да останат во состојба на зголемена готовност до понатамошно известување“, се наведува во предупредувањето.

Боте Коши извира во Тибет и се влева во непалската река Тришули. Таа потоа продолжува кон Индија преку речниот систем Гандак.

Новата тревога следува откако спасувачките операции претходно беа привремено запрени поради друга опасност. Стравувањата тогаш ги предизвика езеро создадено зад природна брана по свлечиште.

Постоеше опасност водата да ја пробие браната и да предизвика нов бран. Потрагата продолжи откако водата се повлече и непосредната закана се намали.

Сега вниманието повторно е насочено кон реките.

Според најновиот биланс, во поплавите во Непал и во Тибет загинаа 567 луѓе. Уште 1.024 лица се водат како исчезнати, а 101 човек е повреден.

Во Непал веќе пристигна и првата американска пратка итна помош. Таа содржи и 2,5 тони храна.

Европската Унија издвои два милиона евра за хуманитарна помош. Средствата се наменети за храна, вода, засолништа и здравствена заштита.

Црвениот крст проценува дека околу 93.000 луѓе се загрозени. Најмалку 17.000 деца имаат потреба од помош.

Поплавите уништија 18 училишта, а оштетија уште 20.