📽️ ПРИНЦОТ ВИЛИЈАМ ИГРАШЕ КРИКЕТ ПРЕД БАКИНГЕМСКАТА ПАЛАТА Идниот крал ја претвори улицата во спортско игралиште

Британскиот принц Вилијам претвори една од најпознатите лондонски сообраќајници, „The Mall“, која води кон Бакингемската палата, во игралиште за крикет, во рамките на промоцијата на неговата награда за заштита на средината „Earthshot“. Во играта му се придружија некои од најголемите имиња во овој спорт.
Авенијата „The Mall“, која води до Бакингемската палата, вообичаено е место каде што се одржуваат кралските поворки и официјалните свечености.

Принцот се појави во кошула и џемпер, без свечената облека што најчесто ја носи на јавни настани, и се испроба во крикет пред палатата.

Меѓу учесниците беа поранешниот капитен на индиската репрезентација Сура́в Гангули, легендарниот играч од Западна Индија Брајан Лара и англискиот капитен Џо Рут. На настанот присуствуваа и поранешниот индиски капитен Аџинка Рахане, англискиот играч Хари Брук и легендарниот англиски играч Џими Андерсон.

Вилијам прво се испроба во фрлање на топката, а потоа ја зеде палката и се обиде да ја удри. Не му успеа секој удар, но на крајот успеа да ја погоди топката и да ја испрати над главите на дел од присутните играчи. Неговите обиди беа проследени со насмевки, а принцот потоа се фотографираше со луѓето што се собраа да го гледаат.

Гангули имал и кратка оценка за неговите способности:

– Добро удираше – рекол тој. Лара, пак, се пошегува дека Вилијам можеби се потценува и дека би можел да има место во неговиот тим, иако смета дека принцот треба уште да ја усовршува техниката на фрлање.

Prince William was all smiles as he showed off his skills during Earthshot’s Cricket on the Mall event on Tuesday in London! 🏏😊 https://t.co/gsjMdcFF0f

— ExtraTV (@extratv) October 13, 2026

Настанот имаше и поширока цел од спортската забава. Со него се истакнуваат врските меѓу Велика Британија и Индија, која следниот месец ќе биде домаќин на годишниот самит и доделувањето на наградите „Earthshot“. Наградата, основана од Вилијам во 2020 година, секоја година избира пет добитници, од кои секој добива по еден милион фунти за развој и проширување на решенија што помагаат во заштитата и обновувањето на планетата.