БИБИ МУ КАЖАЛ НА ТРАМП ДЕКА ВОДОВОДЏИЈА ГО СПАСИЛ ЛЕТОТ НА „ФЛАЈДУБАИ“ Знаел што да направи оти гледал ТВ-серија

Израелски водоводџија кој никогаш не управувал со авион го совладал копилотот и помогнал да се израмни авионот на „Флајдубаи“ додека леталото нагло губело височина – ова е неверојатната верзија на драмата што американскиот претседател Доналд Трамп вели дека лично ја слушнал од израелскиот премиер Бенјамин Нетанјаху.

– Мислам дека е неверојатна приказна. Разговарав со Биби Нетанјаху детално за овој настан – им рече Трамп на новинарите во Овалната соба.

Според информациите што му ги пренел Нетанјаху, копилотот „можеби бил терорист или можеби шверцер“ и го избодел капетанот. Трамп нагласи дека мотивот сè уште не е утврден.

Ранетиот капетан, според неговиот исказ, успеал да ја отвори зајакнатата врата од пилотската кабина и да повика помош.

– На некој начин, тој беше херој – рече Трамп, посочувајќи дека вратите на пилотската кабина се направени така што не можат едноставно да се отворат однадвор.

Тогаш во приказната влегува израелскиот патник Јанив Хајун, кого Трамп го опиша како водоводџија.

– Израелски водоводџија виде што се случува. А знаете, кога кревате цевки цел ден, силни сте – рече Трамп.

Според неговото прераскажување, Хајун бил во предниот дел од авионот, ги слушнал повиците за помош и влегол во пилотската кабина додека леталото веќе нагло губело височина. Тој го извлекол копилотот од седиштето, по што други патници помогнале да биде совладан и врзан.

Никогаш не летал, но гледал ТВ шоуа

Најнеобичниот дел од приказната следувал дури потоа. Трамп тврди дека Хајун, иако никогаш не управувал со авион, ги фатил командите и помогнал леталото да се израмни.

– Бидејќи никогаш не летал со авион, тој го зел воланот, го кренал и го израмнил авионот пред да се урне – рече Трамп.

Објаснувањето како водоводџијата знаел што да направи било уште понеобично.

– Кога го прашале зошто го направил тоа, тој рекол: „Гледам емисии за воздушни катастрофи“ – раскажа американскиот претседател.

Трамп рече дека Хајун често ја гледал серијата „Воздушни катастрофи“ и дека, според приказната што му ја пренел Нетанјаху, токму од неа стекнал претстава како функционираат командите на авионот.

„Не знам дали е вистина“

Американскиот претседател сепак не ја претстави целата верзија како независно утврден факт и самиот се огради од дел од драматичните детали.

– Еве ја приказната што ја слушнав. Не знам дали е вистина, но тоа е приказната што ја добив од Биби – рече Трамп.

Тој се огради и од тврдењето дека копилотот намерно сакал да го урне авионот.

– Тие рекоа дека сакал да се урне. Тие не го знаат тоа. Тие немаат такви информации – рече американскиот претседател.

Летот FZ1073 на „флајдубаи“ патувал од Дубаи кон Израел со 174 лица кога во пилотската кабина дошло до насилен инцидент. Копилотот од Оман го нападнал индискиот капетан, по што авионот почнал брзо да губи височина.

Патници и членови на екипажот влегле во кабината и го совладале копилотот, а двајца други пилоти кои патувале во авионот потоа ја презеле контролата. Леталото безбедно слетало во Табук, Саудиска Арабија.

Израелецот Хајун лично се сретна со Нетанјаху веднаш по враќањето во Израел. Израелскиот премиер го пречека на аеродромот „Бен Гурион“, го прегрна и го нарече херој.