ТРАМП САКА „ДА ЈА РЕШИ КУБА“ ПРЕД ДА ЗАМИНЕ Шефот на САД не исклучува воена операција

Претседателот на САД Доналд Трамп изјави дека сака да го реши прашањето за Куба пред да ја напушти Белата куќа и дека не ја исклучува употребата на воена сила. Во интервју со конзервативниот радиоводител Хју Хјуит, тој потврди дека би разгледал дури и кратка воена операција против островската држава.

– Сакам да го решам прашањето за Куба пред да заминам. Имаме многу добар, талентиран човек за Куба, кој се вика Марко – изјави Трамп, мислејќи на американскиот државен секретар Марко Рубио.

Според транскриптот од интервјуто, објавен од „Рол кол“, Хјуит директно го прашал претседателот дали би одобрил еднонеделна воена кампања доколку тоа е потребно за промена на власта во Куба.

– Секако би ја разгледал таа можност, да – одговорил Трамп.

Американскиот претседател не најави конкретна операција, ниту прецизираше кога би можела да биде преземена воена акција.

Тој истакна дека неговата администрација внимателно ја следи состојбата во Куба, која ја опиша како пропадната држава.

– Многу внимателно ја следиме. Состојбата е многу лоша. Тоа е, во суштина, пропаднато место, држава, како и да сакате да го наречете – рече Трамп.

Рубио во центарот на плановите

Трамп посебно го истакна државниот секретар Марко Рубио, чии родители потекнуваат од Куба.

Според американскиот претседател, Рубио има личен интерес да придонесе за промена на состојбата во земјата од која потекнува неговото семејство.

– Неговите родители се од Куба, како што веројатно знаете, и тој многу би сакал да го направи тоа – изјави Трамп.

Претседателот ја поврза својата намера и со кубанската заедница во американската сојузна држава Флорида.

Тој тврдеше дека освоил 94 проценти од гласовите на Американците со кубанско потекло во Флорида и дека денес ужива уште поголема поддршка меѓу нив.

– Би сакал да го направам тоа за тие луѓе, за Кубанците кои дојдоа овде откако таму се однесуваа многу лошо кон нив – рече Трамп.

„Куба наскоро ќе падне“

Новата изјава следува по неколку претходни пораки на Трамп за иднината на кубанската власт.

Во понеделникот, 9 ноември, тој пред новинарите изјави дека очекува Куба наскоро да се соочи со политички пресврт.

– Куба ќе биде интересна. Претпоставувам дека наскоро ќе падне – рече американскиот претседател.

Трамп тогаш повторно ја опиша Куба како држава што не функционира, обвинувајќи го нејзиниот комунистички систем за економските и политичките проблеми.

Во март годинава отиде и чекор понатаму, изјавувајќи дека би му било чест да ја преземе Куба.

– Мислам дека можам да правам што сакам со неа. Без разлика дали ќе ја ослободам или ќе ја преземам, мислам дека можам да правам што сакам – им рече тогаш на новинарите.

За време на Генералното собрание на Обединетите нации во септември, американскиот претседател побара фундаментална промена на политичката состојба на островот.

Тој тогаш потврди дека Марко Рубио е вклучен во разговорите со кубанските власти.

– Марко Рубио води преговори и е длабоко вклучен во разговорите со Куба. Ќе видиме што ќе се случи – изјави Трамп.

Во понеделникот, на состанокот на министрите за надворешни работи на Г7 во Париз, Рубио повторно порача дека Вашингтон сака поинаква иднина за Куба.

Тој нагласи дека САД ќе се обидат да помогнат, но дека промените ќе зависат и од одлуките на кубанските власти.