НОВ ПРЕСВРТ ВО СУДЕЊЕТО НА МАЈКА ШТО ЈА ПОТРЕСЕ АМЕРИКА Линдзи од полицијата дознала дека децата ѝ се мртви?

 

Судењето на Линдзи Кленси за смртта на нејзините 3 деца доби нов пресврт. Одбраната побара целосно отфрлање на обвинението, откако претходно 11 од 12 поротници биле подготвени да ја прогласат за некривично одговорна поради непресметливост.

Сега, адвокатот Кевин Редингтон тврди дека Кленси нема сеќавање на трагедијата и дека дури во болница од полицијата дознала што се случило, откако останала парализирана по обидот за самоубиство.

Адвокатот остро ја критикуваше полициската истрага како површна, посочувајќи конкретни форензички пропусти во куќата, вклучувајќи го и прозорецот од кој Кленси скокнала.

– Немаше никаква реална истрага. Тие не ја ни проверија мрежата на прозорецот од кој таа скокна, ниту пак прашокот во чашата за кој тврдат дека бил за здробени лекови. Тие едноставно веднаш претпоставија дека оваа жена е виновна. Не е ова никаква нуклеарна физика – јас едноставно тврдам кое е законското право, дека обвинителството нема докази надвор од разумно сомневање.

Редингтон сега ја напаѓа самата доказна основа на обвинението, а не само прашањето за нејзината пресметливост. Според одбраната, постпородилната психоза и лековите влијаеле врз нејзината ментална состојба и ја оставиле без сеќавање за критичните моменти.

– Каде се доказите дека таа го направила ова? Целиот овој случај се заснова на шпекулации. Каде е признанието? Каде кажа таа дека го направила ова?

Редингтон тврди дека истражителите прерано заклучиле дека Кленси е виновна и дека обвинителството нема доволно докази за осуда надвор од разумно сомневање.

Обвинителството посочува на ДНК и признание

Обвинителката Шенан Бакингем го отфрли како смешно тврдењето дека нема докази. Обвинителството посочува дека ДНК на Кленси била пронајдена на ластиците со кои биле задавени децата и дека таа подоцна признала што сторила пред болнички свештеник.

Побарано е и ограничување на јавните изјави на адвокатите, со образложение дека медиумското настапување може да ја претвори постапката во спектакл.

Според обвинителството, трагедијата се случила на 24 јануари 2023 година, кога Кленси наводно ги одвела децата во подрумот на семејниот дом во Даксбери додека нејзиниот сопруг бил излезен да земе храна и лекови.

Обвинителите тврдат дека во тој период со ластици за вежбање ги задавила 5-годишната Кора, 3-годишниот Досон и 8-месечниот Калан. Потоа си нанела повреди и скокнала од прозорецот на вториот кат во обид да си го одземе животот, при што останала парализирана.

Телата на децата подоцна ги пронашол нејзиниот сопруг по враќањето дома.

Еден поротник го смени текот на судењето

Новиот потег на одбраната доаѓа по претходното судење, кое заврши без пресуда. Според поднесоците на Редингтон, 11 од 12 поротници биле подготвени да ја прогласат Кленси за некривично одговорна поради нејзината ментална состојба.

Во претходниот процес спорот не бил дали Кленси ги убила децата, туку дали во моментот на убиствата можела да разликува добро од зло. По речиси 40 часа расправи во текот на 7 дена, поротата не успеала да донесе едногласна одлука.

Единаесет поротници биле подготвени за пресуда дека не е виновна поради непресметливост, додека еден останал на спротивниот став. Судот на 4 септември го прогласил судењето за неважечко, а одбраната потоа најавила дека ќе се обиде да спречи нов процес.

Следното рочиште треба да покаже дали судијата ќе го прифати барањето на одбраната за отфрлање на случајот или обвинителството повторно ќе ја изведе Кленси пред порота.