ТРАМП ВЕЛИ САКАЛЕ ДА НАПРАВАТ ГОЛЕМА ШТЕТА Мажи со маски и 3 бели комбиња кренаа тревога, евакуирани 85 домови

Британската полиција испрашува петмина мажи уапсени во близина на базата на Кралските воздухопловни сили „Ферфорд“ во западна Англија. Тие се осомничени за кривични дела поврзани со експлозиви и тероризам.

Тројца од нив биле уапсени откако полицијата добила дојава дека 3 големи бели комбиња се движат кон воениот аеродром. Локална земјоделка пријавила и група „мажи со качулки и маски“ кои трчале кон околните ниви.

Американскиот претседател Доналд Трамп изјави дека осомничените имале намера да предизвикаат „голема штета“. Тој потврди дека случајот го истражуваат британските и американските власти.

Робот за експлозиви меѓу комбињата

Полицијата поставила кордон од 400 метри околу базата, а биле евакуирани жители од 85 домови. Во близина на белите комбиња бил забележан и робот за деактивирање експлозивни направи.

Безбедноста околу „Ферфорд“ и други американски објекти во земјата потоа била засилена со вооружени полицајци и тешка механизација.

Базата има особено значење поради американските операции против Иран. Британската влада во март им дозволила на САД од „Ферфорд“ да испраќаат американски бомбардери во напади врз ирански ракетни постројки.

Мажи со качулки, можна иранска врска?

Земјоделка која се јавила на 999 кога видела „голема група мажи со качулки и маски“ во близина на  „Ферфорд“ рано наутро во недела, верува дека им ги „оневозможила“ плановите. Таа за програмата Today изјавила дека се враќала дома од забава кога патот бил блокиран од „три бели комбиња“.

Потоа видела како групата мажи бегаат.

– Мислам дека беше чиста среќа што пристигнав во селото во слично време како и комбињата.

Но, министерот за одбрана на Велика Британија Вес Стритинг вели дека жената има само „делумна слика“. Тој одбива да шпекулира за можни ирански врски.

ИРЦГ претходно ја предупреди Британија

Иранскиот Корпус на Исламската револуционерна гарда во јули ја предупредил Велика Британија да не дозволува американски бомбардери да полетуваат од „Ферфорд“. ИРЦГ тогаш порача дека секоја база користена за напади врз Иран ќе се смета за легитимна цел.

Иран, сепак, повеќепати негирал вмешаност во напади или заговори на британска и меѓународна почва.

Британските антитерористички служби сè уште јавно не соопштиле кој би можел да стои зад случајот. Извор запознаен со истрагата навел дека како најверојатен се разгледува мотив поврзан со Иран, но истражителите проверуваат и други можности, меѓу кои руска саботажна операција или исламистички заговор.

Министерот за одбрана Вес Стритинг одби да шпекулира за мотивот додека трае истрагата. Зборувајќи за пошироката закана, сепак, тој рече дека британските власти знаат оти Иран и неговите поддржувачи сакаат да ѝ наштетат на земјата и дека нивните обиди редовно мора да бидат спречувани.

Велика Британија во мај вовела санкции за 12 лица и компании поврзани со Иран поради непријателски активности и дестабилизација.