📽️ СКИЈАТОС ЗА ПОЛА ЧАС ПОД ВОДА Улиците се претворија во поројни реки, водата носеше маси и столици

Силно невреме го погоди грчкиот остров Скијатос во саботата вечерта, при што за само околу половина час дел од улиците се претворија во поројни реки. Најпогодени биле централните делови на островот и крајбрежјето, каде што надојдената вода носела предмети и опрема од угостителските објекти.

Невремето започнало околу 19 часот, а количината и интензитетот на дождот биле исклучително високи. Според податоците пренесени од грчките медиуми, дневната количина на врнежи достигнала 67,2 милиметри, додека околу 19:20 часот максималниот интензитет на дождот достигнал дури 281 милиметар на час.

Огромни количества вода се слевале по улиците кон брегот, при што пороите носеле сè што ќе им се најде на патот. Меѓу предметите што ги носела водата имало маси, столици и друга опрема од локалите.

Водата навлегла и во повеќе угостителски објекти, особено во оние што се наоѓаат на пониските точки. По повлекувањето на водата, сопствениците и вработените започнале со чистење и со проценка на штетата.

Снимките од островот покажуваат улици прекриени со надојдена вода, а на делови од крајбрежјето впечатокот бил како улиците и морето да се споиле.

Проблеми биле регистрирани и со електричната енергија. Во дел од островот дошло до прекин во снабдувањето со струја, додека вода навлегла и во една просторија на локалното стручно училиште – ЕПАЛ. Според досегашните информации, и покрај силниот интензитет на невремето, не се пријавени други поголеми последици.

Поројниот дожд сериозно го отежнал и сообраќајот. Во моментите на најсилните врнежи, движењето по одделни улици било практично невозможно.

Невремето било дел од поширокото влошување на временските услови во регионот. Магнезија и Спорадите останале во состојба на готовност поради прогнозите за нови врнежи и можни силни временски феномени во текот на неделата.

За жителите и сопствениците на локалите неделното утро започнало со расчистување на последиците од невремето кое за само триесетина минути претвори делови од Скијатос во поројни водотеци.