УАПСЕН БИТОЛЧАНЕЦ ЗА ПРЕДИЗВИКУВАЊЕ ПОЖАР Се сомничи дека запалил сува трева и палети во поранешно стовариште
Во пожарот биле зафатени сува трева и дрвени палети, а интервенцијата на противпожарната единица спречила понатамошно ширење на огнот. Нема повредени.
Полициски службеници од СВР Битола вчера го лишиле од слобода 67-годишниот Б.С. од Битола, поради сомнение дека предизвикал пожар на улицата 4 Ноември.
Од Министерството за внатрешни работи информираат дека пожарот бил пријавен околу 12:35 часот, а во него биле зафатени сува трева и дрвени палети во поранешното стовариште на осомничениот.
„Вчера во 15:40 часот, полициски службеници од СВР Битола го лишија од слобода Б.С.(67) од Битола. Тој се сомничи дека околу 12:35 часот предизвикал пожар на ул. 4 Ноември во Битола, при што била зафатена сува трева и дрвени палети во неговото поранешно стовариште“, соопшти МВР.
Пожарот бил изгаснат од екипа на Територијалната противпожарна единица од Битола. Во инцидентот нема повредени лица.
На местото бил извршен увид од екипа на СВР Битола. Од МВР велат дека по целосното документирање на случајот против 67-годишникот ќе биде поднесена соодветна пријава.