НЕОЧЕКУВАН ПРЕСВРТ ВО ПРИВАТНАТА ДРАМА НА ЛУКА ДОНЧИЌ Поранешната свршеница побара да се отфрли нејзиниот случај
Анамарија Голтес побарала судот да го отфрли случајот што самата го покрена во март. Адвокатката на кошаркарската ѕвезда возврати дека постапката „никогаш не требало да биде поднесена“.
Судската битка меѓу Лука Дончиќ и неговата поранешна свршеница Анамарија Голтес доби неочекуван пресврт. Нејзиното барање за издршка беше формално отфрлено во петокот, откако самата побарала запирање на постапката, пишува Њујорк Пост.
Судијката Мелиса Лионс го одобри барањето без прејудицирање. Тоа значи дека Голтес има можност повторно да поведе постапка.
Сослушувањето не помина без искри меѓу адвокатите. Лаура Васер, адвокатката на ѕвездата на „Лос Анџелес лејкерс“, тврдеше дека случајот воопшто не требало да стигне до суд.
– Верувам дека во нашата документација, ваша чест, стоеше дека ова никогаш не требаше да биде поднесено. Но, верувам дека господинот Ицковиц ќе ви каже дека побарал отфрлање на целата постапка, а вие дури и не треба да одлучувате за нашето барање за поништување. Дали е тоа точно, господине Ицковиц? – рече Васер.
Адвокатот на Голтес, Еван Ицковиц, призна дека Васер е во право. Потоа објасни дека уште на 3 август се обиделе да го повлечат случајот.
– Всушност, го поднесовме и беше одбиен поради недостаток на потпис од господинот Дончиќ, што не е потребно. Повторно го поднесовме врз основа на препорака од службеник – рече Ицковиц.
Спорот почна на 9 март, кога Голтес формално побара издршка од Дончиќ. Со судскиот поднесок во јавноста излезе и информацијата дека долгогодишните партнери се разделиле.
Дончиќ потоа ја ангажираше познатата адвокатка за семејно право Лаура Васер. Таа побара случајот да биде отфрлен и тврдеше дека Голтес ја избрала Калифорнија поради поповолните правила за издршка.