ШЕСТ АКТИВНИ ПОЖАРИ, ДВА СЕ ПОД КОНТРОЛА Еве каде денеска гори низ Македонија

Во Македонија до 13 часот денеска се регистрирани 12 пожари на отворен простор, од кои шест се активни, два се ставени под контрола, а четири се целосно изгаснати, информира Центарот за управување со кризи (ЦУК).

Најголем број активни пожари има во различни шумски и рурални подрачја.

Во Општина Студеничани, пожарот се шири на потегот Моране – Вртекица – Рамни Габер, каде што гори мешана шума.

Активен пожар има и во Општина Македонски Брод, во месноста Видуш, кај селата Драгов Дол и Локвица. Таму гори ниска вегетација, нискостеблеста шума и грмушки.

Во Општина Новаци огнот зафатил подрачје на потегот Маково – Црничани – Рапеш, каде што гори ниска вегетација и деградирана шума.

Пожар е активен и во село Слп, Општина Велес, каде што гори ниска вегетација и ретка дабова шума.

Во Општина Јегуновце, активен е пожарот во село Копанце, каде што гори шума.

Шестиот активен пожар е во село Зајас, Општина Кичево, каде што е зафатена нискостеблеста шума.

Според ЦУК, два пожари во моментов се ставени под контрола.

Во Општина Крушево, пожарот на потегот село Алданци – село Норово зафатил нискостеблеста деградирана дабова шума. Пожар има и на градската депонија во Делчево, но тој е ставен под контрола.

Во текот на денот се изгаснати четири пожари.

Во Општина Могила се изгаснати пожарите кај селата Лознани и Вашарејца, каде што горела ниска вегетација.

Изгаснат е и пожарот во село Лопатица, Општина Битола, каде што била зафатена ниска вегетација.

Во Општина Штип, изгаснат е пожарот во село Сушево, исто така на површина со ниска вегетација.

Последниот од евидентираните изгаснати пожари бил на улицата Иво Лола Рибар во Тетово, каде што горела ниска вегетација.

ЦУК продолжува да ја следи состојбата со пожарите на отворен простор на територијата на државата.