ХОТЕЛИЕРИТЕ НА ХАЛКИДИКИ И ВО СОЛУН ОТВОРААТ СОБИ ЗА ПОГОДЕНИТЕ ОД ПОЖАРОТ Со бродови досега се евакуирани 446 лица

Хотелиерите на Халкидики и Солун имаат слободни соби за погодените од големиот пожар што избувна во Сивири на првиот крак од Халкидики. Информацијата доаѓа во момент кога најновите бројки за евакуирани со пловила се искачи на 446 лица.

„Хотелиерите на Халкидики и Солун, во соработка со Министерството за туризам и цивилна заштита, ја активираа платформата на Грчката хотелска комора за сместување на сите погодени од пожарот. Колегите можат да објават колку празни соби има во моментов за сместување на оние на кои им е потребна помош“, нагласи претседателот на Здружението на хотелиери на Халкидики.

Поради празникот 15 август, Халкидики има стапка на пополнетост на хотелите од околу 90% и поради оваа причина Здружението побара помош од своите колеги од Солун за целосно покривање на сите потреби што ќе се појават.

„Не знаеме колку луѓе се погодени и мора да бидеме соодветно подготвени“, се наведува во соопштението.

Се забележува дека посебната платформа што беше ставена во функција за привремено сместување на погодените од шумскиот пожар на подрачјето на општина Касандра функционира на веб-страницата на Министерството за климатски кризи и цивилна заштита.

Акцијата ја спроведува Министерството за туризам во соработка со Грчката хотелска комора, со цел да се обезбеди привремено сместување за граѓаните погодени од пожарот.

Покрај ова, вајавени се места за собирање и привремено засолниште во Касандра и Калитеа поради пожарот на Халкидики.

Општина Касандра објави дека се спроведува планот „IOLAOS“ поради пожарот на Халкидики. Во соопштението се наведува дека се отворени и достапни места за собирање и привремено засолниште во Касандра и Калитеа.

Во Касандра во следните области:
– Црква „Рождество на Пресвета Богородица“
– Црква „Свети Христофор“
– Стадион „Касандра“
– Затворена теретана „Касандра“

Во Калитеа во следните области:
– Затворен стадион „Калитеа“
– Стадион „Калитеа“
– Општински паркинг „Калитеа“

Како што е наведено во соопштението на општината, жителите и посетителите кои треба да се евакуираат можат да се упатат кон горенаведените точки, секогаш следејќи ги упатствата на 112, Противпожарната служба, Грчката полиција и Цивилната заштита.

„Ве молиме останете смирени, не правете непотребни движења и строго следете ги упатствата на надлежните органи. Општина Касандра е во целосна оперативна подготвеност и ќе следат дополнителни информации во зависност од развојот на ситуацијата“, се наведува во соопштението.

Пожарот сè уште не е ставен под контрола, меѓутоа вечерва ситуацијата е значително подобрена, а на Халкидики пристигнуваат дополнителни противпожарни сили од повеќе делови на Грција.

Според податоците од крајбрежната служба на Грција, 250 лица од плажата во Сивири се безбедно пренесени во марината во Сани, додека пак 196 лица се во траектот „Спидранер“ што сообраќа од островите Скијатос, Скопелос и Алонисос до Солун и засега сè уште не е јасно дали ќе бидат префрлени во Солун.