ОРУЖЈЕТО ВО САД ЌЕ СЕ ДОСТАВУВА ПО ПОШТА Дали од промената на правилото ќе заработува и синот на Трамп?

Канцеларијата за алкохол, тутун, огнено оружје и експлозиви (ATF) на САД предлага нова регулатива со која се предвидува директна достава на оружје на домашни адреси, што би можело да поттикне огромен пораст на онлајн продажбата во која е вклучен и најстариот син на американскиот претседател.

Според предложеното, лиценцираните трговци ќе можат да им  испраќаат огнено оружје директно на адреси на жители во истата држава. Купувачите се должни да поминат онлајн проверка на идентитетот и криминалната евиденција, по што следи седумдневен период на чекање во кој се известуваат локалните полициски сили.

Сега, клиентите кои нарачуваат оружје преку интернет мора да го подигнат во физички продавници и да поминат проверка лично, освен ако немаат посебна дозвола.

Доколку предлогот помине, тоа би била една од најзначајните промени во политиката за оружје на САД во последните две децении.

Некои сопственици на продавници за оружје, претставници на индустријата и застапници за контрола на оружјето предупредуваат дека директната испорака претставува значителен ризик за јавната безбедност, како и закана за опстанокот на малите продавници со физичка локација.

Промената на правилото би можела директно да му користи на Трамп помладиот, чии повеќе од 300.000 акции во GrabAGun моментално вредат повеќе од 700.000 долари, што е намалување од повеќе од 5 милиони долари минатата година.

Портпаролот на Трамп помладиот, Ендру Сурабијан, тврди дека синот на претседателот немал никаква улога во предлагањето на новите правила на ATF.

– Дон е претприемач целиот свој живот и гласен застапник за нашите права загарантирани со Вториот амандман. Како дел од неговите улоги во компаниите во кои инвестира или советува, тој не комуницира со федералната влада и не бил вклучен на никаков начин во оваа конкретна одлука – рече тој.

Извршниот директор на GrabAGun, Марк Немати изјави дека ниту тој ниту Трамп помладиот не знаеле дека предлогот се подготвува.

Минатата година Доналд Трамп помладиот му помогна на онлајн трговецот со оружје, познат како „Амазон за оружје“, да излезе на берза. Сега компанијата GrabAGun, во која синот на американскиот претседател е акционер и член на одборот, би можела да оствари огромен профит благодарение на предложената промена на правилата.