МАЈКА ЈА ПРЕТЕПАЛА ЌЕРКАТА, СИН ГО НАПАДНАЛ ОЧУВОТ Осум пријави за семејно насилство, пет лица завршија во притвор

Во последните 24 часа полицијата евидентирала осум случаи на семејно насилство низ државата, при што пет лица биле лишени од слобода, а со едно лице бил извршен службен разговор. Меѓу најсериозните случаи е оној во Битола, каде 53-годишен маж ѝ се заканувал на сопругата со огнено оружје.

Според информациите од Министерството за внатрешни работи, полициските службеници интервенирале во повеќе градови по пријави за физички напади, закани и насилство меѓу членови на семејството.

Во Кичево, околу 16:20 часот, била лишена од слобода 40-годишната Ј.С., која, според пријавата, во алкохолизирана состојба физички ја нападнала својата малолетна ќерка.

Во Куманово, пак, бил уапсен 34-годишен маж, откако неговата поранешна сопруга пријавила дека физички ја нападнал во неговиот дом.

Во Битола, полициски службеници го лишиле од слобода 53-годишниот В.А., кој во семејниот дом со огнено оружје ѝ се заканувал на својата сопруга.

Во Прилеп, 50-годишна жена пријавила дека била физички нападната од својата стрина, а полицијата работи на расчистување на случајот.

Во Росоман, 67-годишна жена пријавила дека нејзиниот сопруг, кој бил под дејство на алкохол, физички ја нападнал.

Во Скопје, полициски службеници извршиле службен разговор со 21-годишник, осомничен дека ја нападнал поранешната партнерка, ѝ упатувал закани и го оштетил нејзиниот мобилен телефон.

Во друг случај во Чаир, бил уапсен 38-годишен маж поради напад врз неговиот 76-годишен очув.

Неколку часа подоцна, повторно во Чаир, полицијата го лишила од слобода 46-годишен маж, кој, според пријавата, со тврд предмет физички го нападнал својот малолетен син.

Од МВР информираат дека по целосното документирање на сите случаи ќе бидат поднесени соодветни поднесоци и кривични пријави.