ЖЕЛЕЗНИЦАТА СЕ МЕНУВА ОД КОРЕН Николоски најави нови возови и милионски инвестиции

Владата има јасна визија за целосна трансформација на железничкиот сообраќај во земјава, истакна заменик-претседателот на Владата и министер за транспорт Александар Николоски на потпишувањето на Договорот за грант со Светска банка, вреден еден милион евра.

Според Николоски, од претпријатија на раб на пропаст, железницата денес бележи раст и постепено заздравување.

– Ако наследивме претпријатија на раб на пропаст и пред банкрот, сега имаме карго сообраќај кој бележи сериозен раст, имаме раст на број на патници и крупни инвестиции во изградба на нови пруги. Водиме политика на развој на железницата како срцевина на економијата – изјави Николоски.

Тој додаде дека средствата од Светска банка ќе бидат насочени кон реформа и преструктурирање на МЖ Транспорт со цел создавање функционално и одржливо претпријатие.

– Најпрво направивме законски измени со кои практично го зачувавме претпријатието, бидејќи претходните одлуки значеа негова ликвидација. Потоа започнавме сериозна внатрешна реформа и веќе се гледаат резултати – годинава имаме позитивни бројки во првите четири месеци, со раст и на патничкиот и на карго сообраќајот – рече министерот.

Николоски информираше дека паралелно со реформите се работи и со Европската Унија во рамки на Планот за раст, кој предвидува трансформација на железничките претпријатија.

Тој најави и голем инвестициски циклус во обновување на возниот парк и инфраструктурата.

– Покрај овој проект, работиме и на набавка на нови возови и електрични локомотиви. Веќе се потпишани договори со други финансиски институции, а планираме набавка на најмалку пет електрични локомотиви – истакна Николоски.

Во делот на инфраструктурата, министерот посочи дека во завршна фаза е првата линија на Градскиот воз, а во тек се подготовки за нови линии.

– Оваа година очекуваме тендер за втората линија од Илинден до новата железничка станица, како и за третата линија од Ѓорче Петров. Проектите треба да бидат завршени до крајот на 2027 или почетокот на 2028 година – додаде тој.

Според Николоски, се работи и на клучните железнички коридори, вклучително и Коридорот 8 и поврзувањето со Бугарија и Албанија.

– Имаме јасна визија за целосна модернизација на железницата. Првата делница кон Бугарија веќе е ставена во функција, на втората се работи, а за третата е во тек тендерска постапка – изјави министерот.

Тој ја истакна и поддршката од Светска банка, заблагодарувајќи се за континуираната соработка во реформите на железничкиот сектор.