SPORT LIFE ДОНИРАШЕ СОВРЕМЕНА ОПРЕМА ЗА ДЕЦА СО РАЗВОЈНИ ПОТЕШКОТИИ Поддршка за две организации што работат со најранливите категории

Компанијата Sport Life донираше средства за две организации кои работат со деца со развојни потешкотии – Здружението „Отворете ги прозорците“ и SLP.BOJAN – Центар за логопедија, специјална едукација и рехабилитација, со цел да обезбеди современа асистивна технологија, рехабилитациски помагала и дидактички материјали што ќе ја подобрат поддршката за децата и лицата со попреченост.

Од компанијата велат дека донацијата е дел од нивната долгорочна стратегија за општествена одговорност и поддршка на заедницата.

– Во Sport Life постојано ги следиме потребите на заедницата и се стремиме да поддржиме иницијативи кои носат реални придобивки за граѓаните. Веруваме дека овие донации ќе помогнат во подобрување на условите за работа на двете организации и ќе придонесат за полесен развој, едукација и инклузија на децата кои се соочуваат со различни предизвици – изјави Петар Поцков, маркетинг директор на Sport Life.

Од компанијата посочуваат дека потребата од стручна поддршка за деца со говорно-јазични, когнитивни, моторни и социо-емоционални потешкотии постојано расте, а современите технологии имаат значајна улога во нивниот развој и едукација.

Од Здружението „Отворете ги прозорците“ велат дека ваквите донации директно придонесуваат за подобар квалитет на услугите што ги добиваат децата.

– Кога компаниите ја препознаваат важноста на солидарноста и инклузијата, се создаваат можности за вистински промени. Со оваа донација ќе обезбедиме дополнителна индивидуализирана поддршка преку асистивна технологија, која им помага на децата со попреченост полесно да учат, комуницираат и учествуваат во заедницата. Заедничките вложувања се клучни за создавање општество во кое можностите се достапни за сите – истакна Радмила Стојковска Алексова, раководителка на Центарот за асистивна технологија при Здружението.

Организацијата веќе две децении обезбедува поддршка за деца со попреченост и нивните семејства, а досега индивидуализирани услуги добиле повеќе од 900 деца со нарушувања од аутистичниот спектар, церебрална парализа, интелектуални попречености и комплексни комуникациски потреби.

Преку својот Центар за асистивна технологија, организацијата обезбедува бесплатен пристап до современи технолошки решенија, едукативни материјали и стручна поддршка за развој на комуникациските, образовните и социјалните вештини.

Благодарност за донацијата упатија и од Центарот SLP.BOJAN.

– Едно утро нè разбуди еден хуман повик. Во нашиот центар се јавија од Sport Life и нè известија дека сакаат да донираат, бидејќи веруваат дека ќе биде од помош токму за оние на кои им е најпотребна – лицата со развојни нарушувања. Оваа донација ни овозможи да набавиме современа технологија за стимулација на говорно-јазичниот, когнитивниот и бихејвиоралниот развој, како и рехабилитациски и сензорни помагала што секојдневно ги користиме во работата. Благодарни сме за поддршката и за препознавањето на важноста на нашата работа – изјави Бојан Богдановски, клинички логопед – специјалист и основач на Центарот.

SLP.BOJAN обезбедува стручна поддршка за деца и лица со развојни потешкотии, говорно-јазични нарушувања и комуникациски предизвици преку индивидуализирани програми за развој на говорот, јазикот, комуникацијата и когнитивните способности.

Од Sport Life потсетуваат дека и претходно реализирале бројни општествено одговорни проекти во областа на здравството, спортот и образованието. Минатата година компанијата донираше средства за реновирање на дел од ГОБ „Св. Наум Охридски“ во Скопје, а обезбеди и стипендии за македонски спортисти кои настапија на Олимписките игри.