КАДЕ ШТО ЗАЕВ ГО БРИШЕШЕ „МАКЕДОНСКИ“, ФИЛИПЧЕ ПИШУВА „СЕВЕРНОМАКЕДОНСКИ“ Тие се на иста линија со Бугарија

Поранешниот лидер на СДСМ Зоран Заев почна со бришење на терминот „македонски” од сите државни институции, а сега неговиот потрчко и чувар на фотелјата во СДСМ Венко Филипче е спремен на тоа празно место да напише „северномакедонски” – обвини Валентин Манасиевски, член на ЦК на ВМРО-ДПМНЕ на прес-конференција.

– Само СДСМ и Филипче немаат проблем кога некој нѐ нарекува „северномакедонци”, затоа за нив тоа е успех и се горди на тоа. Само Филипче и СДСМ, и нивниот врховен лидер Заев, немаат проблем да водат антинационална и антидржавна политика, која е во интерес на бугарските власти. За нив, нема ништо лошо во тоа Бугарија да го негира нашето постоење пред 1944 година, нашите револуционери и дејци да бидат Бугари и нашиот македонски јазик да биде произлезен или пак дијалект на бугарскиот јазик – рече Манасиевски.

Според Манасиевски, само Филипче и СДСМ повикуваат на уставни измени, кои се првиот чекор од „сетот“ барања на Бугарија.

– Филипче и СДСМ се на иста линија со Бугарија. Ставовите им се исти, барањата им се исти. Уценетиот Филипче молчи и не одговара за што е уценет од група на бугарски политичари. Дали во уцената е вмешан и Зоран Заев – праша Манасиевски.

Тој му порача на Филипче да се вразуми и да ги штити македонските интереси, а не бугарските.

– Македонија мора да добие јасни гаранции дека уставните измени ќе бидат последното барање за влез на Македонија во ЕУ. Македонија мора да влезе во ЕУ како достоинствена, горда и исправена држава, а не наведната, усрамена и понижена како што беше со влезот во НАТО – рече Манасиевски.