📽️ АСТРОНАУТИТЕ ОД „АРТЕМИС II“ БЕЗБЕДНО СЛЕТАА Екипажот постави рекорд и ја заврши мисијата

Четворицата астронаути од мисијата Артемис II безбедно се вратија на Земјата по десетдневен лет околу Месечината, со што беше завршена првата американска мисија со екипаж во близина на Месечината по повеќе од половина век.

Екипажот го сочинуваа Рид Вајсман, Кристина Кох, Виктор Гловер и канадскиот астронаут Џереми Хансен. Тие слетаа со капсулата Орион во Тихиот Океан, крај брегот на Сан Диего, во 20:07 часот по источно американско време.

Леталото се приземји исправено со помош на три падобрани, по што спасувачките екипи брзо пристигнаа на местото. Пред слетувањето имаше шестминутен прекин на комуникацијата со контролата на мисијата во Џонсон Спејс Центар, што е вообичаено при повторното влегување во атмосферата.

По безбедносната проверка, астронаутите ја напуштија капсулата и со хеликоптер беа префрлени на транспортниот брод на американската морнарица „USS John P. Murtha“, каде што ги поминаа првите медицински прегледи.

За време на мисијата тие прелетаа околу 1.126.540 километри и поставија нов рекорд за најголемо растојание оддалечено од Земјата што го поминале луѓе – околу 406.769 километри, надминувајќи го претходниот рекорд од мисијата Аполо 13.

Успешното враќање претставува важен чекор во рамките на програмата Артемис на НАСА. Агенцијата планира лансирање на мисијата „Артемис III“ кон средината на 2027 година, додека слетување на Месечината е предвидено за 2028 година.

Американскиот претседател Доналд Трамп им честиташе на астронаутите за „спектакуларното патување и совршеното слетување“, додавајќи дека со нетрпение го очекува нивниот прием во Белата куќа и идните мисии, вклучувајќи ги и плановите за лет до Марс.