ПО 50 ГОДИНИ, ЧОВЕКОТ СЕ ВРАЌА НА МЕСЕЧИНАТА Артемис II ќе лета околу неа, ама нема да слета
Според најавите на НАСА, „Артемис II“ треба да полета најрано во февруари 2026 година, а мисијата ќе трае околу 10 дена.
Луѓето повторно ќе летаат кон Месечината, повеќе од пет децении по последната мисија од програмата „Аполо“. Американската вселенска агенција НАСА ја подготвува мисијата „Артемис II“, која ќе означи историско враќање на човекот во длабоката вселена.
Станува збор за пилотирана мисија во која астронаути ќе летаат околу Месечината, без слетување на нејзината површина. Летот е планиран како тест-мисија со екипаж, со цел да се проверат сите системи и технологии што ќе се користат за идните мисии со слетување.
Според најавите на НАСА, „Артемис II“ треба да полета најрано во февруари 2026 година, а мисијата ќе трае околу 10 дена. Вселенскиот брод „Орион“ ќе ја обиколи Месечината по таканаречена слободна траекторија и потоа ќе се врати назад на Земјата.
Во мисијата ќе учествуваат четворица астронаути: Рид Вајсман како командант, Виктор Гловер како пилот, Кристина Кох како специјалист за мисијата и Џереми Хансен, кој е астронаут од Канадската вселенска агенција. Ова ќе биде првпат Канада да има свој претставник во мисија до Месечината.
„Артемис II“ ќе биде првиот човечки лет околу Месечината од 1972 година, кога заврши програмата „Аполо“. Во рамки на мисијата ќе се тестира новиот ракетен систем SLS и вселенското летало „Орион“, дизајнирани за долгорочни мисии во длабоката вселена.
НАСА наведува дека оваа мисија е клучен чекор кон „Артемис III“, која треба да донесе и реално слетување на астронаути на површината на Месечината подоцна во оваа деценија, вклучително и прва жена и прв астронаут со различно етничко потекло.
Програмата „Артемис“ има поширока цел – воспоставување долгорочно човечко присуство на Месечината, кое ќе послужи како основа за идни мисии кон Марс. Со ова, НАСА отвора ново поглавје во истражувањето на вселената и враќањето на човекот подалеку од Земјата.
Who would you take with you on a trip around the Moon?
As we prepare to send our Artemis II astronauts around the Moon, we’d love to know who’s on your dream team. Use the hashtag #NASAMoonCrew and we may share yours during the launch broadcast: https://t.co/2cTxQZwOYf pic.twitter.com/UNvEJsVbSS
— NASA (@NASA) January 26, 2026