📽️ САМО МАЖИ ЌЕ ЛЕТААТ НА МЕСЕЧИНАТА ВО 2028 ГОДИНА? Мисијата Артемис под критики, НАСА има објаснување

Изборот на екипажот за мисијата „Артемис III“ отвори нова дебата околу една од најважните вселенски програми на САД. Причината е фактот што во составот на посадата нема ниту една жена, што предизвика бројни реакции меѓу љубителите на вселената и дел од јавноста.

Администраторот на НАСА, Џеред Ајзекмен, јавно застана во одбрана на одлуката. Тој порача дека процесот на селекција бил воден исклучиво од способностите на кандидатите и од потребите на мисијата.

„Видов реакции коишто се движат од разочарување до негодување“, напиша Ајзекмен на социјалната мрежа Икс.

Тој повика вниманието да биде насочено кон избраните астронаути и кон интегритетот на процесот, наместо кон нивниот пол.

„Избран е тимот со најдобри шанси за успех“

Според првиот човек на НАСА, изборот бил резултат на сложена постапка во која биле разгледувани бројни критериуми. На крајот била избрана посадата за која било проценето дека има најголеми шанси успешно да ги исполни целите на мисијата.

Ајзекмен нагласи дека меѓу астронаутите на НАСА има многу извонредни жени кои играат важна улога во сегашните и во идните вселенски проекти.

Тој потсети и на американската астронаутка Кристина Кох, која беше дел од екипажот на „Артемис II“ и стана првата жена што ја обиколи Месечината.

 

Introducing Artemis III.

Four astronauts. Three launches. Two dockings. One splashdown.

In 2027, the Artemis III mission will practice docking the Orion spacecraft with two lunar landers in low Earth orbit — the capability we need to return humanity to the Moon’s surface. pic.twitter.com/8uhMUxuuWX

— NASA (@NASA) June 9, 2026

„Артемис“ треба да го врати човекот на Месечината

Програмата „Артемис“ е клучниот американски проект за враќање на луѓето на Месечината по повеќе децении пауза. Нејзината долгорочна цел е воспоставување одржливо човечко присуство на Месечината и подготовка за идни мисии кон Марс.

Мисијата „Артемис III“ првично беше претставена како чекор кон ново слетување на Месечината. Според најавите на Ајзекмен од февруари, следната фаза од програмата е планирана како орбитална мисија за тестирање, без слетување на површината.

Програмата има и пошироко значење. Освен научната димензија, таа е дел од глобалната трка за технолошка, комерцијална и стратешка предност во вселената, каде конкуренцијата меѓу големите сили станува сè поизразена.