СКАНДАЛ ВО КУМАНОВО, ЗЕЛ ПАРИ ОД ДОНАЦИИ ЗА СЕБЕ Член на Одбор украл милиони од кошаркарски клуб
Член на Одборот на директори на Кошаркарски клуб Куманово 2009 АД е пријавен за злоупотреба на службената положба и овластување, откако незаконски исплатил скоро 5 милиони денари од донации на себе и на уште две лица.
Управата за финансиска полиција поднесе кривична пријава против В.Б., член на Одборот на директори на Друштво за спортски дејности Кошаркарски клуб Куманово 2009 АД Куманово. Тој се сомничи за сторено кривично дело „Злоупотреба на службената положба и овластување“, согласно член 353 став 4 и 5 в.в со ст. 1 од Кривичниот законик на Република Македонија.
Според информациите од полицискиот билтен, В.Б. ги пречекорил своите службени овластувања доделени од друштвото, постапувајќи спротивно на член 14-д од Законот за спорт и договорите за донации склучени помеѓу Стопанска банка АД Скопје, Цементарница УСЈЕ АД Скопје и Клубот.
Имено, пријавениот самоволно донел одлука за исплата на парични средства од клубот кон себе и уште две лица како бонус, без да свика седница на Одборот на директори и без законска основа. Исплатените средства потекнувале од донации и спонзорства, како и од ваучери од Агенцијата за млади и спорт, кои не смееја да бидат исплатени на тој начин.
Со ваквото постапување, В.Б. нанел имотна штета на клубот во вкупен износ од 4.896.000 денари, прибавувајќи противправна корист за себе и за други лица.
Случајот е пријавен кај Основното јавно обвинителство Куманово и ќе следи натамошна правна постапка, истакнувајќи ја сериозноста на контролата врз финансиите и донациите во спортските организации.