ПОСТИГНАТО ПРИМИРЈЕ ВО ТРГОВСКАТА ВОЈНА КИНА-САД Трамп и Си Џинпинг се договорија за намалување на царините

Американскиот претседател Доналд Трамп објави дека постигнал договор со Си Џинпинг за намалување на царините за стоки од Кина. За возврат, Кина ќе продолжи да купува соја од САД, ќе го одржува извозот на ретки метали и ќе преземе посилни мерки против нелегалната трговија со фентанил, лек против болки, изјави Трамп во четвртокот. Тој ја даде изјавата по средбата со кинескиот претседател Си Џинпинг во јужнокорејскиот град Бусан, прва лична средба меѓу двајцата лидери од 2019 година наваму. Веста првично донесе олеснување на финансиските пазари: кинеските акции се искачија на десетгодишен максимум, а јуанот се искачи на највисоко ниво во однос на доларот за речиси една година.

„Мислам дека беше фантастична средба“, им рече Трамп на новинарите во претседателскиот авион „Ер Форс“ по заминувањето од Бусан. Царините за стоки од Кина ќе бидат намалени од 57 на 47 проценти, истакна Трамп, но не наведе повеќе детали.

Фентанилот, синтетички опиоид, кој создава висока зависност, до 50 пати посилен од хероинот, може да биде смртоносен само во неколку милиграми. Трамп постојано ја обвинуваше Кина за ширењето на фентанилот во САД, а во февруари воведе дополнителни царини за кинески производи, наведувајќи ја кризата со фентанил како оправдување. Со овој договор со Си Џинпинг царините за кинески стоки поврзани со фентанил ќе бидат намалени од 20 на 10 отсто, со моментална примена.

На почетокот на состанокот, Си Џинпинг изјави дека кинеските и американските преговарачи постигнале „фундаментален консензус“. Тој призна дека е нормално двете страни да не се согласуваат секогаш. Сепак, Си, рече дека Кина и САД треба да бидат партнери и пријатели. Тој додаде дека развојот на Кина не е во спротивност со визијата на Трамп за „повторно голема Америка“.

Разговорите, одржани на маргините на самитот на Азиско-пацифичката економска соработка (АПЕК), траеја речиси два часа. Потоа Трамп го придружи Си до неговото возило пред самиот да се качи на „Ер Форс Уан“. За Трамп, ова го означи крајот на азиската турнеја за време на која тој, исто така, најави напредок во трговските преговори со Јужна Кореја, Јапонија и земјите од Југоисточна Азија. Берзите ширум светот веќе достигнаа рекордни максимуми во последните денови.

Си го пофали и „големиот придонес“ на Трамп кон неодамнешното примирје во Газа. Тој истакна дека Кина, исто така, се залагала за мировни разговори во други кризни зони. Си изјави дека е подготвен да продолжи да работи со Трамп за да изгради солидна основа за билатералните односи со САД.

Трамп од неделата постојано ја покренуваше можноста за договор со Си. Во тоа време, американските преговарачи објавија дека постигнале рамковен договор со Кина, чија цел е да спречи 100-процентни американски царини за кинески стоки и да ги одложи кинеските извозни ограничувања за ретки метали – сектор доминиран од Народната Република. Сепак, останува да се види колку долго ќе трае ублажувањето на тензиите меѓу двете најголеми економии во светот. Двете земји неодамна покажаа зголемена подготвеност да заземат тврд став во областите на економска и геополитичка конкуренција.