УЧИЛИШНАТА КОШНИЧКА ИМ ЗАШТЕДИ 3.000 ДЕНАРИ НА СЕМЕЈСТВАТА СО УЧЕНИЦИ Ристески вели дека и мерките за вработување се успешни

Интересот за мерките за вработување голем, бидејќи оперативниот обем е зголемен за 7,5 милиони евра, односно достигнува околу 40 милиони евра, изјави денеска заменик-министерот за економија и труд Марјан Ристески, за време на посетата на  Делчево каде што на средба со претставници со бизнис секторот ја следеше реализацијата на активните мерки за вработување и економски развој за тековната година.

Средствата, како што нагласи, се наменети не само за бизнис-секторот, туку и за невработените лица кои сакаат да започнат сопствен бизнис или да се вработат во реалниот сектор, особено во малите и средни претпријатија.

-Овие мерки нема да останат во постојната форма, туку ќе ги унапредуваме со цел Оперативниот план да биде уште поактивен, насочен кон развој на стопанството и намалување на невработеноста. На крајот на годината ќе направиме анализа за да видиме кои мерки ќе продолжат и ќе бидат уште поблиски кон потребите на бизнис-секторот – рече Ристески.

Во Делчево заменик министерот воедно го презентираше и завршниот биланс од акцијата „Училишна кошничка“ која траеше до 15 септември.

Според првичните информации, едно семејство во просек заштедило до 3.000 денари.

-Во текот на реализацијата на оваа акција беа спроведени околу 400 вонредни инспекциски надзори. Беа утврдени мали пропусти кои веднаш беа коригирани на местата каде што се продаваше училишен материјал – рече Ристески.

Заменик министерот посетата на Пијанец и Малеш ја продолжува со средба со претставници на бизнис секторот од Берово.