ДРИСЛА БАРА ПОЛИЦИЈАТА ДА ГИ ФАТИ ПОТПАЛУВАЧИТЕ Раководството се сомнева дека пожарот е политички мотивиран

ЈП Дрисла денеска преку соопштение апелира до МВР да ги најде и да ги санкционира потпалувачите на пожарите во депонијата, за кои, како што се наведува, има сомненија дека се политички мотивирани.

Од Дрисла тврдат дека работат според предвидените процеси и стандарди и оти тие не се причина за загадувањето.

„Апелираме до Министерството за внатрешни работи да пристапат кон истрага за изнаоѓање и санкционирање на потпалувачите на пожарите, кои се сомневаме дека се политички мотивирани за дефокусирање од реалните проблеми. Депонијата Дрисла без вакви намерни инциденти нема никаков потенцијал за загадување и работи според највисоки стандарди“, се вели во соопштението од ЈП Дрисла.

Тврдат дека Дрисла е единствената санитарна лиценцирана депонија која од 2022 година не согорува отпад туку го стерилизира и го компримира, со што нема никаква можност за загадување.

„Сите тековни активности на претпријатието се извршуваат согласно техничко-технолошкиот проектиран процес, имајќи ги предвид заштитата на животната средина, здравјето на човекот и природата, а во согласност со постоечките законски прописи“, наведуваат од ЈП Депонија Дрисла Скопје.

Во соопштението нема детали за тоа како се чува депонијата и како е можно лица од надвор да влезат среде ѓубрето и да го запалат.

Соопштението следува  3 дена по палењето на Дрисла и откако премиерот Христијан Мицкоски денеска изјави дека е чудно како во одредени јавни претпријатија каде што свои кадри има ДУИ се случуваат вакви работи.

„ЧУДНИ РАБОТИ СЕ СЛУЧУВААТ ВО ПРЕТПРИЈАТИЈАТА КАДЕ РАКОВОДИ ДУИ“ Кому му одговараат пожари пред локалните избори, прашува Мицкоски