ВУЧИЌ И ПУТИН ЌЕ СЕ СРЕТНАТ ВО ПЕКИНГ, ВО ОЧИ ГОЛЕМАТА ПАРАДА Ќе муабетат за Косово, за Република Српска и за други прашања
Помошникот на рускиот претседател Владимир Путин нагласи дека на разговорите меѓу Путин и Вучиќ ќе биде разгледана актуелната ситуација на Косово и Метохија, како и прашања поврзани со Република Српска. Средбата Путин-Вучиќ е меѓу неколкуте билатерални средби кои Путин треба да ги има при посетата на церемонијата за 80-годишнината од крајот на Втората светска војна во Пекинг.
Српскиот претседател Александар Вучиќ и рускиот лидер Владимир Путин ќе се сретнат следната недела во Народна Република Кина, за време на самитот по повод 80-годишнината од крајот на Втората светска војна, потврди помошникот на рускиот претседател Јуриј Ушаков.
Путин ќе престојува во Кина од 31 август до 3 септември и ќе присуствува на свечената церемонија во чест на „Денот на победата“. Ушаков нагласи дека на разговорите меѓу Путин и Вучиќ ќе биде разгледана актуелната ситуација на Косово и Метохија, како и прашања поврзани со Република Српска. Двајцата лидери детално ќе разговараат и за руско-српската соработка, со посебен фокус на енергетскиот сектор, но и на други стратешки области од заеднички интерес.
Средбата Путин-Вучиќ е меѓу неколкуте билатерални средби кои Путин треба да ги има со кинескиот претседател, индискиот премиер, иранскиот и турскиот претседател и со лидерот на Узбекистан.
На парадата во Пекинг е најавно присуството на 26 светски лидери, меѓу кои и севернокорејскиот претседател Ким Јонг Ун. На парадата се очекува Кина да го покаже моќните авиони, ракети и суперсонично оружје и да продефилираат десетици илјади војници прикажувајќи ја дипломатската солидарност меѓу Кина, Русија и глобалниот Југ.
Вучиќ на 9 мај присуствуваше на парадата на „Денот на победата“ во Москва и покрај политичките притисоци од Европската Унија, која остро се спротивстави на неговото присуство. Летот до Москва бил отежнат поради воздушните блокади од балтичките земји, па српскиот авион морал да кружи и да го заобиколува затворениот воздушен простор. На Црвениот плоштад Вучиќ беше еден од ретките европски лидери, заедно со словачкиот премиер Роберт Фицо, кој директно застана до Путин, но српскиот претседател не одржа говор.
Овој симболичен гест предизвика остра реакција во Брисел, каде беше оценет како удар по европскиот пат на Србија.