НАПРАВЕТЕ ТЕСТ КОЈ ОТКРИВА КОЛКУ ЌЕ ЖИВЕЕТЕ Леснотијата со која седнувате и станувате може да го предвиди животниот век

Леснотијата со која некој седнува и станува, користејќи што е можно помалку поддршка, може да помогне во предвидувањето на должината на животниот век.

Возрасните кои успешно го завршиле таканаречениот тест за седнување и станување имале многу помала веројатност да умрат од природни или кардиоваскуларни причини во текот на 12-годишното следење отколку оние кои постигнале најнизок резултат на тестот, според бразилската студија објавена во European Journal of Preventive Cardiology.

Нејзините наоди се додаваат на растечкиот број докази што покажуваат дека различни мерења на физичките функции, вклучувајќи ја флексибилноста, способноста за стоење на една нога и силата на стисокот, можат да ја предвидат долговечноста. Тестот, велат истражувачите, мерел неколку клучни компоненти на анаеробната кондиција одеднаш: мускулна сила или моќ, флексибилност, рамнотежа и состав на телото.

Максимални десет поени

За да постигнете совршен резултат и да ги заработите максималните десет поени (пет за успешно седнување и пет за успешно станување), треба да седнете на подот и да станете од него без да ги користите рацете и дланките, подлактиците, колената или страните на нозете за потпора. Покрај тоа, мора да останете стабилни.

Ако почнете да ја губите рамнотежата или, на пример, треба да клекнете или да ја ставите раката на подот за потпора, почнувате да губите поени. Ако не можете да ги извршите задачите без надворешна помош, како што е потпирање на ѕид или маса или без помош на друго лице, губите поени.

Дали прогнозите се точни?

Студијата анализирала податоци од 4.282 лица на возраст од 46 до 75 години, од кои 68 проценти биле мажи. Сите го направиле тестот за седнување и станување како дел од доброволна проценка на физичката подготвеност помеѓу 1998 и 2023 година. Никој немал никакви физички или клинички ограничувања што би го ограничиле нивното учество во тестот.

Во текот на 12-годишното следење, 665 учесници (15,5 проценти) починале од природни причини. Од оние кои постигнале совршени резултати на тестот, починале 3,7 проценти. Од оние кои постигнале осум поени, починале 11,1 процент, додека меѓу оние кои постигнале резултати од нула до четири поени, починале 42,1 проценти.

Во анализа која ги прилагодила возраста, полот, индексот на телесна маса и клиничките варијабли, истражувачите откриле дека луѓето со најниски резултати имале 3,8 пати поголема веројатност да умрат од природни причини и шест пати поголема веројатност да умрат од кардиоваскуларни причини отколку оние со највисоки резултати.

Авторите признаваат дека клучните прашања остануваат неодговорени: Кој „рецепт за вежбање“ најуспешно би ги подобрила резултатите од тестовите или би ги одржала на високо ниво? Дали подобрувањето на резултатите би го продолжило животниот век? Како се споредуваат предвидувањата базирани на овој тест со резултатите базирани на други тестови?

Тренинг за сила

Како што коментирал д-р Даниел Форман од Универзитетот во Питсбург, улогата што неаеробнатакондиција ја игра во здравјето сѐ повеќе се препознава. Тој се занимава со срцева рехабилитација и ја нагласува важноста на тренингот за сила во нејзини рамки, а не само на аеробните вежби кои долго време беа во фокусот:

– Не е доволно да се помисли „Ќе пливам неколку пати неделно“. Сега се нагласува важноста на додавање тренинг за сила најмалку двапати неделно. Тие се подеднакво важни, ако не и поважни, за спречување на влошувањата. Станувањето од седечка положба на подот е динамична вежба која вклучува сила и рамнотежа, а тешкотијата при неговото изведување може да открие оштетување или влошување. Тестот е евтин и дава важни информации, па затоа неговиот основен принцип може да биде поважен од точната техника што се користи за тестирање и евалуација на физичките способности – смета д-р Форман.