СКОПЈАНИ ВО ЕДЕН ДЕН ПОТРОШИЛЕ ВОДА КОЛКУ ЗА 140 ОЛИМПИСКИ БАЗЕНИ Водовод со сериозен апел, системот на раб на колапс

Скопје се соочува со сериозна опасност од дестабилизација на водоснабдувањето, граѓаните за само еден ден потрошиле повеќе од 350 милиони литри вода, што е еквивалент на 140 олимписки базени. Просечно, секој скопјанец користел над 664 литри вода дневно, што е далеку над нормалата за едно домаќинство.

Од Јавното претпријатие Водовод и канализација – Скопје предупредуваат дека оваа енормна потрошувачка особено е изразена во попладневните часови и резултира со прекини во водоснабдувањето, особено на високите зони во градот.

„И покрај секојдневните апели и преземање мерки, се соочуваме со сериозни преоптоварувања на системот. Водата неконтролирано се троши за полевање бавчи, миење автомобили и полнење базени“, посочуваат од Водовод.

Претпријатието упатува итен апел до граѓаните за рационална и совесна употреба на водата, особено во услови на летни горештини и зголемени потреби.

Граѓаните кои забележат див приклучок може да го пријават на: 02 3073 010, [email protected], www.vodovod-skopje.com.mk.

„Со дивите приклучоци се нанесува директна штета на системот и на квалитетот на водоснабдувањето до сите корисници во градот“, предупредуваат од ЈП Водовод и канализација – Скопје.

Според податоците од Пописот 2021, Скопје брои 526.502 жители. На база на потрошените 350 милиони литри, секој жител на главниот град дневно користел просечно 664 литри вода, количина која е неколкукратно повисока од европските стандарди.