🎥 МОНТИ ПАЈТОН ПОЛОВИНА ВЕК ВО БОРБА СО ЦЕНЗУРАТА Ова е сцената од „Животот на Брајан“ која застапниците на трансродовата агенда бараат да се забрани

Одвреме-навреме на социјалните мрежи се лиферуваат коментари во кои застапниците за повеќе родови идентитети бараат култната група Монти Пајтон да исфрли една контроверзна сцена од филмот „Животот на Брајан“, бидејќи таа наводно била „старомодна“ или „потенцијално болна“ за денешната публика. На оваа тема деновиве пак се појавија коментари на Фејсбук, како и потсетување на тоа дека Монти Пајтон не трпи цензура. 

Полемиката датира од 2023 година, кога во дел од медиумите почнаа да се појавуваат извештаи дека некои актери во новата театарска адаптација на „Животот на Брајан“ („Life of Brian“) во САД, предложиле да се исфрли „Сцената со Лорета“, сметајќи дека денес е „неприфатлива“ и дека може евентуално да навреди луѓе со „поинакви родови чувства“. Лидерот на групата Џон Клиз (John Cleese) тогаш енергично изјави дека нема намера да попушти на ваквите барања и дека сцената останува дел од театарската адаптација во Велика Британија и во САД.

Која е култната група Монти Пајтон?

Пред да го прикажеме видео-записот од спорната „Сцена со Лорета“ и пред да објавиме транскрипт од сцената за тие кои послабо се снаоѓаат со англискиот јазик, да потсетиме на фактот дека Монти Пајтон (Monty Python) претставува една од највлијателните и најреволуционерни хумористични групи во историјата на телевизијата и на филмот. Формирани во доцните 1960-ти од шестмина британски и американски комичари (Џон Клиз, Ерик Ајдл, Мајкл Пејлин, Тери Џонс, Греам Чапман и Тери Гилијам), тие го создадоа култното ТВ-шоу „Летечкиот циркус на Монти Пајтон“ (1969–1974), кое направи пресврт во тогашниот британски хумор. Со апсурд, интелектуална игра со јазикот, гротеска и со сатира на британскиот систем, монтипајтоновци директно се судрија со традиционалните форми на комедија и му дадоа на хуморот субверзивна димензија.

Влијанието на Монти Пајтон се чувствува не само во британската култура, туку и во целиот свет. Тие инспирираа генерации комичари. Нивниот стил стана синоним за интелигентен, но и апсурден хумор. Сценаријата со нелинеарна структура, исклучителните игри со логиката и формата, како и политичките и социјални коментари, ја сместија групата во пантеонот на светската сатира.

„Животот на Брајан“ – симбол на сатирата против догмата

Филмот  „Животот на Брајан“ (1979) е третото и едно од најконтроверзните дела на Монти Пајтон. Филмот е снимен под режија на Тери Џонс, со продукциска поддршка од Џорџ Харисон (екс-Битлс), откако студиото се повлече поради верскиот контроверзен материјал. Приказната го следи ликот Брајан Коен, Евреин кој случајно е роден на ист ден и веднаш до Исус Христос, поради што луѓето постојано го мешаат со месијата. Наместо да биде духовен водач, Брајан е човек што се заплеткува во политички, верски и апсурдни ситуации во Јудеја под римска окупација.

Филмот ја исмејува догматичноста на религиозните и na политичките движења, како и склоноста на масите да бараат водач по секоја цена. Сите главни улоги (вклучувајќи ги и женските ликови) ги толкуваат членовите на Монти Пајтон, особено Греам Чапман (како Брајан), Џон Клиз, Мајкл Пејлин и Ерик Ајдл. Иако беше забранет во многу земји (вклучително и во некои делови од Британија), со текот на времето „Животот на Брајан“  стана култен филм и симбол на сатирата против догмата.

А сега, фамозната „Сцена со Лорета“!

„Сцената со Лорета“ (Loretta Scene) е една од најпознатите сцени од филмот. Во неа, претставници на револуционерната група „Народен фронт на Јудеја“, дебатираат меѓу себе, откако ликот Стен (го игра Мајкл Пејлин) изјавува дека сака да биде жена и да се вика Лорета, барајќи „право да раѓа деца“. Иако нема физичка можност за тоа, другите членови на групата (вклучувајќи ги и ликовите на Џон Клиз и Греам Чапман) негуваат бизарна, но политички коректна дискусија за тоа дали „Лорета“ има право да го изрази својот идентитет и да бара поддршка за нешто што е биолошки невозможно. Ова е таа сцена: