ДИЈАЛОГОТ Е ДОБРЕДОЈДЕН, НО НЕ СО СТАРИТЕ ЛИЦА Димитриевски рече дека креаторот на проблемите не треба да биде и креатор на решенијата

Дијалогот во политиката е неопходен и добредојден, ги поздравувам сите видови дијалог во политичката комуникација, но не треба да се даде повторно можност креаторот на проблемите да биде и креатор на решенијата, рече вечерва претседателот на Движењето ЗНАМ, Максим Димитриевски, коментирајќи ја вчерашната средба меѓу премиерот Христијан Мицкоски и лидерот на СДСМ Венко Филипче.

Како што нагласи Димитриевски во Дневникот на ТВ Сител, „не треба да се дозволи истите луѓе кои не доведоа во ваква состојба да бидат и креатори на решенија. Имаме легитимна, стабилна Влада, со апсолутно мнозинство која носи одговорност да изнаоѓа решенија“.

Според претседателот на ЗНАМ, Филипче манифестира „чисто лицемерие“ со кое сака да постигне ефект на самопрогласен лидер на опозицијата, а во моментов е само претседател на опозициска политичка партија. Димитриевски не ја исклучува можноста и другите партиски лидери од опозицијата да побараат „вакви форми на дијалог“.

На прашањето за евентуална лидерска средба, Димитриевски не исклучува свое присуство иако смета дека таквите средби, како што истакна, се повеќе дебата меѓу политичките репрезенти, а одговорноста за сите постапки секогаш ја презема власта.

„Препукувањето“ меѓу потпретседателот на Собранието Антонио Милошоски и министерот за правда Игор Филков, Димитриевски го квалификува како изнесување лични ставови и видувања, подвлекувајќи дека ВМРО-ДПМНЕ и ЗНАМ немаат никакви отворени прашања кои би го нарушиле функционирањето на Владата и парламентарното мнозинство.

– Секогаш сме подготвени на разговор и дијалог, посебно кога се во прашање државните интереси и кога има потреба од компромиси и постигнување консензус, но би било лошо да се воспостави пракса креаторот на проблемите да биде и составен дел на решенијата. Имаме нов Деловник во Собранието кој остава голем простор за дискусија во рамки на легитимна постапка при донесување на законите, а роковите се продолжени и сметам дека тоа треба да се сведе на пратеничките групи. За сите идни нови решенија секогаш се добредојдени експертски мислења во веќе претходно планирани процедури. Да земам за пример, како тие што го донесоа најконтроверзниот Казнен закон што дозволи амнестија на голем број луѓе од претходната власт и на добар дел на луѓето од периодот на владеењето на Груевски, сега ќе влезат во постапка и процедура за креирање ново законско решение поврзано со измените во Казнениот законик? Да, добредојдени се сите ставови, дијалогот исто така, но сметам дека не треба да се даде повторно можност креаторот на проблемите да биде и креатор на решенијата – рече Димитриевски.

Според него, досега имало многу лидерски средби, но сериозен епилог од нив немало.

– Лидерските средби се воспоставена форма што се практикува во кризни моменти за државата, сме имале многу такви видувања, но сериозен епилог немало. Повеќе тоа би го дефинирал како дебата меѓу политичките репрезенти кои би се состанувале и би разменувале мислења што е здраво за демократијата, но одговорноста за сите постапки секогаш ја презема власта. Имаме редовна комуникација со премиерот, одржуваме редовни средби, редовно се брифираме за се. Веќе разговаравме за повеќе теми, меѓу кои и за оваа, за одржување редовни средби. Како претседател на ЗНАМ не исклучувам присуство на такви средби, но повторно ќе потенцирам, одговорноста е во Владата која само треба да им потврди на граѓаните дека ќе живеат во посигурна држава со систем на вредности и подобар стандард, како и дека ќе се решат најголемиот број проблеми кои особено беа креирани од претходната власт – истакна Димитриевски.

Во врска со „комуникацијата“ меѓу Милошоски и Филков, тој тврди дека се работи за изнесување лични ставови и дека нема проблем меѓу владините партнери.

– Премиерот тоа го дефинира како лош ден, а јас би го дефинирал како лоши и некоректни изјави, но како и да е, тоа се лични ставови и видувања, а неофицијални на партиите. Ние во коалицијата со ВМРО-ДПМНЕ немам никакви отворени прашања кои би го нарушиле функционалноста на Владата и парламентарното мнозинство. Можеби такви изјави ќе слушаме и во иднина и иако се лични, мислам дека е политички некоректно да се коментира вонпартиски органи и тела за одредени работи кои сепак претходно беа анализирани од мандатарот и претставниците во извршната власт – рече Димитриевски, додавајќи дека Филков има право на свое мислење и во иднина, повтори, не исклучува вакви испади или ставови на луѓе во партијата.

Претседателот на ЗНАМ оцени и дека не му е првпат на Милошоски да излегува со личен став и видување.

– Нормално е, секогаш пред избори се разгорува реториката на политичките репрезенти за да соберат ситни поени за себе – рече Димитриевски.

Тој не прецизира дали ќе биде повторно кандидат за градоначалник на локалните избори и повтори дека ЗНАМ ќе излезе со свои листи за советници. Во тек се, информира, разговори со ВМРО-ДПМНЕ за заемна поддршка на кандидатите во сите општини.