КАРАДАКОСКИ БИЛ ЕДЕН ОД НАЈКРИТИЧНИТЕ ПАЦИЕНТИ Имал изгореници на 40% од телото и бубрезите му откажале
Министерот за здравство, Арбен Таравари, изјави дека причината за смртта на Александар Карадакоски била инфекцијата што ја добил како последица на големата површина на изгореници на неговото тело. Тој изрази надеж дека состојбата на останатите критично повредени пациенти ќе се подобри и дека ќе можат да се вратат во земјата.
Министерот за здравство, Арбен Таравари, потврди дека има уште една жртва од трагедијата во Кочани. Починатиот, кој беше на лекување во Литванија, имал 40% изгореници, а на 1 април му откажале бубрезите. Според првичните информации, се работи за Александар Карадакоски, управителот на дискотеката „Пулс“.
Овој пациент беше еден од четворицата пациенти кои беа во критична состојба.
– Од 1 април му откажа работата на бубрезите, практично беше ставен на дијализа. За жал, утрово ја добив лошата информација дека тој починал. Да се надеваме дека на другите критични ќе им се подобри состојбата. Пациентот што почина, 40% од телото му беше со изгореници. На крајот, главниот проблем беше инфекцијата која што ја добил поради огромна површина на рани кои ги имал на телото. Да се надеваме дека другите критични ќе поминат подобро и дека ќе ни се вратат во државата – рече Таравари.
Извори од МНР за МИА информираат дека е започната процедурата за враќање на телото на пациентот.
Ова е 60-та жртва од пожарот во дискотеката во Кочани што се случи рано изутрина на 16 март.
Повеќе информации се најавени на прес-конференцијата во 13.30 часот во Министерството за здравство.