ПРВПАТ ПРЕД ЛИЦЕТО НА ПРАВДАТА СЕ ИЗВЕДУВААТ СЕГАШНИ И ПОРАНЕШНИ ФУНКЦИОНЕРИ Институциите работат професионално и посветено, велат од ВМРО-ДПМНЕ

Македонската јавност е сведок дека прв пат, како никогаш досега државните институции посветено работат на целосно расчистување на трагедијата која ја потресе целата држава, соопшти ВМРО-ДПМНЕ.

За првпат институциите приведуваат, испитуваат, отвораат истраги, без оглед на политичка или етничка припадност, велат од партијата на Христијан Мицкоски.

„Во опсежна и сеопфатна истрага се испитуваат сите причини кои доведоа до трагичниот настан во Кочани и сите одговорни се изведуваат пред лицето на правдата. Опсежната истрага на надлежните органи до сега опфати голем број на лица без разлика на нивната партиска или пак етничка припадност, сегашни или пак поранешни државни функционери. За само недела дена од трагедијата во сеопфатната истрага, опфатени се над 40-тина лица на кои им се одредени и мерки притвор. Меѓу уапсените има функционери од ВМРО-ДПМНЕ, СДСМ, ДУИ како и луѓе кои не се политички определени или ориентирани. Ова покажува дека органите на системот, како што се обвинителството и судството, иако лицата кои работат во нив се избрани од тефтерчињата на Заев и Ахмети, сепак знаат да работат професионално. Но вистинското прашање, е зошто на СДСМ сега им смета и го доведува во прашање нивното професионално работење? Кога СДСМ зборува за селективна правда, треба само да потсетиме на трагедиите кои се случија во изминатиот период и во кои немаше сеопфатни истраги и немаше човек што понесе одговорност“, соопшти ВМРО-ДПМНЕ.

Седум години власт на СДСМ, никој не понесе никаква одговорност и немаше приведени за трагедии како Ласкарци, Беса Транс или Модуларната болница, каде единствено „виновни” беа каблите или пак шасиите, наведено е во соопштението.

„Вистинското прашање е зошто тогаш за таквите трагедии немаше сеопфатни истраги и зошто немаше приведени и одговорни лица, дали затоа што обвинителството и судството беа под директна партиска контрола на СДСМ? Трагедиите не треба да се користат за дневно-политичка пресметка, туку тие треба да не обединат сите без разлика на партиската, етничката или пак верската припадност во тагата и болката и да застанеме зад институциите за нивно целосно расчистување. За ВМРО-ДПМНЕ ова не е тема за политичка битка, туку на оваа трагедија гледа како на историски момент за целосно ресетирање на системот, нешто што ѝ е потребно на Македонија“, соопшти партијата.