НА СДСМ МУ ТРЕБА ЛИДЕР КОЈ ГО НЕМА БАГАЖОТ ОД ПОСЛЕДНИТЕ ПОРАЗИ Да престане битката за партијата, порачува Филип Темелковски

Ниеден активен функционер од сегашново раководство не може да биде дел од идното лидерство на СДСМ, не затоа што јас или некој друг така мисли, туку зашто народот го кажа своето. Доста е. Мора да престане битката за партијата, а да се потрудиме да ја вратиме борбата за социјалдемократијата.

Ова, поранешниот градоначалник на Општина Кисела Вода и активист на СДСМ, Филип Темелковски, го пишува во својата колумна насловена како „Манифест на еден социјалдемократ“.

„Поминаа уште едни избори, претрпевме уште еден голем пораз. Изгубивме уште една битка, битка по којашто социјалдемократското членство и симпатизери, водено од сегашните лидери и политики се преполови и паднаа на рекордно ниска бројка од 150.000 гласови. Битка во која не само што е поразена социјалдемократијата, туку е скршен и целиот морал и вредности за кој се залагаше нашиот врв. Ја изгубивме битката на сите фронтови и полиња. Но тоа и не е толку трагично, колку што е трагичен фактот, што уште неосвестени од поразот на битката, дел од генералите и лидерите на таа битка, објавија желби за превласт и преземање на партијата, којашто тие и досега ја командуваа, без да извлечат никаква поука од поразот, којашто беше јавно пратена од народот. А таа е ниеден активен функционер од сегашново раководство не може да биде дел од идното лидерство на СДСМ, не зошто јас или некој друг така мисли, туку зошто народот го кажа своето. ДОСТА Е. Мора да престане битката за партијата, а да се потрудиме да ја вратиме борбата за социјалдемократијата“, пишува Темелковски.

Со едно се согласувам со последната колумна на Стефан Богоев, додава Темелковски, а тоа е дека прво треба да се проверат нашите редови и членство и тоа не само оние кој имаат сега книшки, туку и оние кои имале, а се откажале од нив, а делат социјалдемократски вредности и ставови.

„Второ, треба да се слушне отчетот на сегашниот председател и раководство, каде и што погрешивме (иако сметам дека сите знаевме и сите грешевме и оние што имаа можност за одлука и оние кој замижувавме пред грешките), а главната грешка секако е во фактот што првично се преценивме себеси и нашиот лидерски тим, а второ не работевме доволно на промена на системот кој требаше да испорача правда и правичност за сите, а со тоа и еднаква можност за успех за сите граѓани на Македонија. Метлата што Драган Спасовски Дац ја подаде на претседателот Заев, не заигра и собира прашина на Бихаќка, а моќта на некој партиски лепачи на плакати на раководните функции, беше преголема и неоправдана и поголемиот дел од нив заборавија дека се во служба на народот, а не во служба на нивните семејства. По светиот грал наречен ЕУ, се чекореше без стратегија, визија и зацртани цели, притоа откажувајки се од принципите, моралите и идеалите, за кои што никој немаше право да тргува. Граѓаните и гласачите беа само за едно нешто согласни во врска со владата на СДСМ, а тоа е дека треба што побргу и што поскоро да замине во заборав и никогаш да не се повтори, а разочараноста беше подеднаква и кај младите и кај пензионерите и кај националистите и кај оние за Европска Македонија, но најмногу кај оние на кој ветивме правда“, пишува Темелковски.

Тој во текстот додава: затоа на СДСМ му е потребен лидер кој го нема багажот на претходните два изборни порази, лидер кој е од редовите на СДСМ, но не бил функционер или член на извршен орган од 2020 па наваму.

„Лидер кој ќе предложи програма, визија и цел, но и финансиски и акционен план како понатаму. Лидер кој ќе ги врати правите социјалдемократски вредности како еднаквост пред законот, просперитет и обединување на нацијата и националните вредности на кој е оваа земја изградена. Лидер со харизма, но и со тим спремен за работа, спремен да го слушне гласот на народот и да работи на неговата иднина. Лидер кој ќе биде отчетен и кој ќе ги остави независни телата на партиата, за да му служат како коректор кога тој греши, пред да дојде корекцијата од народот. Лидер кој ќе ги врати младите, но и ќе ги обедини искусните и заслужните членови, кој ќе помогнат со нивните искуства креирајки ја правилната стратегија за развој на партијата и креирајќи ја новата визија и план за Европска Македонија. Екипата на новото раководство на СДСМ мора да направи реална програма и цели, како ќе се задржат младите со анализа на образованието и нови работни места и трендови, но мора да најде можност и за мирни пензионерски денови на постарите кој го хранеа фондот и системот изминативе 30 години со нивната мака труд и пот. Сметам дека не смее да се избрза со изборот на овој лидер и мојот предлог е обединето раководство до наредните локални избори, кој сплотено ќе работат на новата Социјалдемократска програма и визија како и чистење на дел од членството кое е неактивно или контролирано од некој претходни лидери. Затоа пред да се тепате кој ќе седне на фотелјата на Бихаќка, дајте да анализираме, како и каде погрешивме и да се потрудиме никој следен да не ја запоседне партијата и да ја менаџира како негов личен имот, туку да чуствува обврска према целото членство и партија и да работи за доброто на сите нас. Дајте да ги тргнеме суетите на страна и да помогнеме на враќањето на социјалдемократијата на правиот пат, зошто за едно сум сигурен дека сите ќе се сложиме, а тоа е дека враќањето нема да биде ниту лесно ниту брзо, а заедно можеме многу пократко и посигурно да ги вратиме изгубените социјалдемократски вредности“, пишува Темелковски во текстот потпишан како Манифест на еден социјалдемократ.