ПОСТОИ И ЧЕТВРТО МИСТЕРИОЗНО НЕУТРИНО Нашиот модел на физика е погрешен, покажаа експериментите

Малите субатомски честици од кои се состои нашиот универзум веројатно имаат ново другарче. Тоа е затоа што Стандардниот модел на физиката, веројатно е погрешен, потврдија нови експерименти кои пак ги потврдија старите истражувања. Неутрината ионака се најчудните меѓу честичките. Речиси и да не реагираат со другите, освен преку гравитација. А, сега освен познатите три има четврто, пишува ИФЛ Наука.

Секоја секунда, 100 трилиони неутрина минуваат низ вашето тело како да не сте ни присутни. Тие можат да се движат навистина долго време. Имајќи толку мала маса и тоа што се електрично неутрални значи дека тие многу малку комуницираат.

Како што е објавено во списанијата Physical Review Letters и Physical Review C , експериментот ги потврдува претходните наоди. Поставувањето е направено од озрачени дискови од хром-51 кои не се формираат природно, а кои инаку се главен извор на електронски неутрина. Дисковите се наоѓаат во два резервоари направени од галиум, а бомбардирањето на електронско неутрино претвора некои од атомите на галиумот во атоми на германиум-71.

Сепак, измерената брзина на оваа реакција е помеѓу 20 и 24 отсто пониска од теоретското моделирање. Една од можностите за овој дефицит на електронски неутрина е дека постои четврто неутрино кое е познато како стерилно неутрино. Или пак, можеби теоријата е погрешна.

– Резултатите се многу возбудливи – вели Стив Елиот, водечки аналитичар на еден од тимовите што ги оценуваат податоците и член на одделот за физика во Лос Аламос.

– Ова дефинитивно ја потврдува аномалијата што ја видовме во претходните експерименти. Но, што значи ова не е очигледно. Сега има спротивставени резултати за стерилните неутрина. Ако резултатите покажат дека фундаменталната нуклеарна или атомска физика се погрешно разбрани, тоа исто така би било многу интересно – додава тој.

Неутрината доаѓаат во три „вкусови“. Постојат електронски неутрина, мионски неутрина и тау неутрина. Еден од најфасцинантните аспекти на неутрината е тоа што тие осцилираат, што значи дека се претвораат од еден вкус во друг додека се движат низ универзумот.

Советско-американскиот галиумски експеримент (SAGE), кој започна во доцните 1980-ти, укажа на можен дефицит на електронските неутрина. Баксанскиот експеримент за стерилни транзиции (BEST), чии резултати пишуваме погоре, го потврдува ова.

Една од можностите е електронското неутрино да осцилира претворајќи се во стерилно неутрино, што би можело да го објасни намаленото производство на германиум. Другата можност е самото електронското неутрино да биде пресечено од други честици и така да се создаде ново стерилно неутрино. Но, знаејќи колку малку реагираат неутрината, ова не е баш уверливо.

Стандардниот модел на физика на честички е еден од најдобрите збирки идеи создадени од човештвото, што ни овозможи да ги предвидиме честичките долго пред да бидат откриени, како што е на пример, Хигзовиот бозон, честицата со која мислевме дека завршува целата физика и дека ќе објасни сѐ.

Но, се покажа дека моделот е  ограничен, а физичарите сега ги достигнуваат тие граници надевајќи се дека ќе откријат што лежи подалеку. Меѓу другото, мистеријата на темната материја и енергија значи дека можеби постои уште цел еден „стандарден модел“ со „темни честици“.