ВМРО-ДПМНЕ БАРА РЕАКЦИЈА НА АНТИКОРУПЦИСКА Георгиевски незаконски дозволи Усеини да гради асфалтна база во Охрид

ВМРО-ДПМНЕ денеска ја повика Антикорупциска комисија да испита како е можно да се откупи парцела за една намена, а веднаш потоа да се измени и правилникот кој сега дозволува изградба на бетонска и асфалтна база во Охрид?

– Антикорупциска да испита на каков начин е спроведена постапка за отуѓување на градежното земјиште свесно оштетувајќи ги буџетот на општина Охрид и буџетот на Република Македонија? и  Дали така свесно се тактизираше за да не пројават интереси други инвеститори за откуп што би значело и повисока продажна цена на земјиштето? – рече Сашо Донев од ВМРО-ДПМНЕ.

Тој обвини дека општината тоа го направила само за да ги задоволи апетитите на Нефи Усеини.

-Константин Георгиески и СДСМ ветуваа нови инвестиции и работни места кај Мауцкер, но за жал ништо не направија и ги згаснаа последните надежи дека таму некогаш ќе никне современа индустриска зона со стотици нови вработувања. Георгиески и СДСМ не само што депонираа илјадници метри кубни шут и ѓубре, туку деновиве исплатија и нова фактура за овој циклус дадени услуги на нивниот вечен доверител Нефи Усеини – рече Донев.

Според него, минатата недела општина Охрид работела само за еден човек.

– Експресно за само неколку часа беше издадено одобрение за градба на бетонска и асфалтна база, се враќаа вработени од одмори, а некои работеа и од дома само да се задоволи барањето на Усеини додека граѓаните чекаат и по две години да добијат едно обично одобрение за градба – рече Донев.

Тој потсети дека градежната парцела кај Мауцкер Усеини ја откупил за багателна сума од 71 денар по метар квадратен според која намената на градежното земјиште беше лесна и незагадувачка индустрија и не предвидува изградба на бетонска и асфалтна база.