Државата ја загорчи среќата – ако остави 10.000 луѓе без работа, ќе добие тужба!

Министерството за финансии упорно турка законски измени кои ќе ги мултиплицираат економските проблеми во државата. Предлогот законот за изменување и дополнување на законот за игри на среќа, кој Министерството за финансии ѝ го предлага на владата има за цел затворање на индустријата игри на среќа. Предложените законски измени содржат дискриминаторски, противуставни одредби кои предвидуваат ретроактивно дејство за веќе завршена правно-финансиска работа. Ако владата и собранието инсистираат по секоја цена да протуркаат вакви измени, ќе треба да преземат одговорност што речиси 10.000 луѓе ќе останат без своите работни места. Ние ќе бидеме принудени да ја тужиме државата за надомест на штета што ќе предизвика многу сериозни финансиски импликации по буџетот, реагира Асоцијацијата на приредувачи игри на среќа (АПИС).

„Предлогот, автомат клубовите да бидат на растојание од 500 метри од основни и средни училишта, за наводно да се заштитат малолетниците, е само приказна за да се сокријат вистинските намери и мотиви! Малолетниците пешачејќи или превезувајќи се до училиштето каде посетуваат настава, повторно ќе мора да поминуваат покрај објектите каде се организираат игри на среќа. Тврдењата дека називите на фирмите и излозите на спортските обложувалници и автомат клубовите ги привлекуваат малолетниците и наводно така преку очите им се создава навика за игри на среќа, се гол популизам кој нема врска со реалноста. Тогаш, по истата логика и со истите аргументи, владата и собранието треба да ги дистанцираат сите кафулиња, кафеани и тобака за малолетниците да се заштитат од алкохол и цигари“, се наведува во реакцијата од АПИС.

Од Асоцијацијата објаснуваат дека зошто предложените измени значат клуч за индустријата игри на среќа – одредено дистанцирање од едно училиште, ќе го приближи автомат клубот или обложувалницата до друго училиште. Овој целосно промашен концепт ќе затвори легален економски сектор и ќе предизвика отворање на подрумски простории каде ќе се игра на црно, како децении наназад. Државата ќе нема ниту контрола, ниту ќе остварува буџетски приливи. Приходите ќе завршуваат во приватни џебови, без да се плаќаат лиценци и даноци, предупредува Асоцијацијата.

„Јасно е дека се работи за политички мотивирани законски измени кои намерно се предлагаат пред локалните избори. Црната кампања со која се креира јавна слика дека во автомат клубовите се одвивале нелегални активности, во кои наводно влегуваш здрав, а излегуваш болен од зависност од игри на среќа, е свесно смислена од оние кои сакаат да предизвикаат хаос и да профитираат од нелегални игри на среќа. Тешка манипулација е дека автомат клубовите се ризични по нашата младина. Не постои записник на инспекциските служби каде е евидентирано присуство на малолетник во автомат клубовите кои се во наша надлежност, што е исклучителна потврда дека ние сме врвни професионалци, општествено одговорни компании кои го штитат јавниот интерес 100% и неселективно ги спроведуваме законските норми. Одговорно тврдиме дека постојат повеќе опции заштитата на малолетниците да биде уште повеќе зајакната, а државата да ги остварува и понатаму постоечките буџетски приливи. Само треба да ги консултираат нашите правни експерти“, нагласуваат клубвите членки на АПИС.