Бајрам бил позитивен на коронавирус, Министерството апелира да не се прави масовен погреб
ЦЈЗ Скопје итно ќе спроведе епидемиолошка анкета со најблиското семејство на починатиот Бајрам со цел точна и детална идентификација на контактите во изминатите денови.
Министерството за здравство информира дека откако кај починатиот Амди Бајрам постмортем е утврдено дека бил позитивен на ковид-19, Центарот за јавно здравје-Скопје ги презема сите мерки за заштита и спречување на понатамошно ширење на инфекцијата во и вон неговото семејство и сите оние кои во изминатиот период имале интензивни и блиски контакти со починатиот.
„Од страна на ЦЈЗ Скопје, согласно редовната постапка во вакви случаи, итно ќе биде спроведена епидемиолошка анкета со најблиското семејство на починатиот со цел точна и детална идентификација на контактите во изминатите денови. Со анкетата ќе биде направена евалуација на степенот на ризик и ќе биде дадена препорака за тестирање, односно самоизолација за неговите контакти. Согласно анкетата, Државниот санитарен и здравствен инспекторат веднаш ќе издаде решенија за изолација за лицата за кои таа ќе биде одредена“, се наведува во соопштението од Министерството за здравство.
Можеби ќе ве интересира
Министертството изразува сочувство до семејството и апелира, во интерес на заштита на нивното здравје, во целост да соработуваат со надлежните служби, како и да се избегнат сите погребни ритуали, а погребот да се спроведе согласно протоколите, како превенција од понатамошно ширење на инфекцијата од ковид-19.
Според Министерството, Амди Бајрам бил донесен во приватна болница во веќе егзитирана состојба (починат). Му бил земен брис, а резултатот потврдил присуство на вирусот ковид-19.