Ивент индустријата бара владата да ѝ исплаќа бруто-плата од март

Здружението на компании за организација, реализација и поддршка на настани, ТВ и филмски продукции го поздравува напорот на Владата за помош на стопанството, но смета дека тие се недоволни и недоречени кога станува збор за оваа индустрија.

– Нашата гранка беше првата што престана да работи на 28 февруари кога се донесе забраната за одржување на јавни собири. Со тоа ние останавме без можност за какви било приходи. Ние немаме можност за он-лајн или шалтерска продажба, па поради тоа нашите компании се под клуч и се со промет од нула денари – рече Петар Георгиевски-Камиказа, кој говореше во име на новоформираното дружение на Ивент индустријата во земјава.

Тој побара од Владата итни и системски мерки со кои ќе им се помогне да го надминат овој тежок момент.

Инвет индустријата покрај досега донесените мерки бара и исплата на бруто-плата за целиот период на траењето на пандемијата, односно сѐ до укинувањето на забраната за одржување на јавни собири. Тие бараат и исплата на бруто-плата да важи од март, поради тоа што оваа индустрија не работи веќе од крајот на февруари.

– Свесни сме за фактот дека нашата работа уште долго ќе биде суспендирана, затоа што забраната за јавни собири ќе биде последна укината. Треба сите да бидеме свесни дека се работи за креативна индустрија и не смееме да дозволиме да згасне – вели Георгиевски.

Во оваа индустрија работат преку 90 компании кои имаат околу 400 вработени, но во овие бројки не се земени предвид сите актери, новинари, ПР агенти кои се вклучени преку хонорарен дел, па во оваа индустрија може да се каже дека се ангражирани и преку 1.000 лица.