СДСМ: Мицкоски неодговорно создава атмосфера на паника

„Дури и во вакви тешки времиња, кога целата држава, институциите, медицинските лица, полицајците, граѓаните, се посветени на борба со коронавирусот и заштита на здравјето Христијан Мицкоски од белиот дворец шири невистини. Крајно несериозно, крајно неодговорно и несоодветно, ВМРО-ДПМНЕ и Мицкоски сакаат да ја злоупотребуваат ситуацијата и со сета сила се обидуваат да создадат атмосфера на паника кај граѓаните“, изјави Костадин Костадинов, портпаролот на СДСМ.

Ниту еднаш, ама ниту еднаш во изминатите три години Мицкоски не се издигна над неговиот личен, партиски или послушнички интерес на Никола Груевски, нагласи Костадинов и рече:

– Нема простор за паника, СДСМ презема одговороност да се справиме со економските последици од оваа криза.

Потоа Костадинов пак образложи дел од мерките за поддршка на економијата и на населението што ги предложи лидерот на СДСМ, Зоран Заев и на новинарско прашање одговори дека СДСМ го поддржува предлогот на министерката за правда Десковска за укинување на буџетските пари за политичарите.