ОСУМ ПОЖАРИ БЕСНЕАТ НИЗ МАКЕДОНИЈА Огнот стигна до шуми и ниска вегетација во повеќе општини
Центарот за управување со кризи информира дека до 13 часот се регистрирани 12 пожари на отворен простор, од кои осум се активни, а четири се изгаснати.
Осум пожари на отворен простор се активни во повеќе делови од земјава, информира Центарот за управување со кризи (ЦУК). До 13 часот денеска, 20 август 2026 година, регистрирани се вкупно 12 пожари, од кои осум се уште се активни, додека четири се целосно изгаснати.
Најголем број активни жаришта има во прилепско-мариовскиот регион, каде што пожарот што зафаќа простор околу селото Чаниште се протега во повеќе правци.
Огнот е активен на потегот село Чаниште – крак кон село Крушевица – село Лопатица, како и на кракот кон Црна Река, кракот кон село Орле во Општина Новаци и кракот кон село Мојно во Општина Могила. Станува збор за пожар што зафаќа ниска вегетација.
Пожар има и во Општина Крушево, каде што активни се жариштата кај селата Белушино и Јакреново. Таму огнот зафаќа ниска вегетација и деградирана дабова шума.
Во скопскиот регион активен е пожарот на потегот село Моране – село Вртекица – село Рамни Габер во Општина Студеничани, каде што гори мешана шума.
Пожарот во Општина Македонски Брод е активен на повеќе локации – во местото Видуш, кај селото Драгов Дол и кај селото Локвица. Таму се зафатени ниска вегетација, нискостеблеста шума и грмушки.
Состојбата е активна и во Општина Кичево, каде што пожарот во селото Тајмиште, местото Дарда, зафаќа високостеблеста букова шума.
Во Велешко, пожар е активен кај селото Караслари, каде што гори ниска вегетација и грмушки.
Жариште има и во Општина Липково, кај селото Никуштак, каде што огнот зафаќа ниска вегетација и шума.
Во Кумановско, активни се два пожара – кај селата Кучкарево и Градиште, каде што гори ниска вегетација.
Од ЦУК информираат дека покрај осумте активни пожари, во текот на денот се регистрирани и четири пожари кои се целосно изгаснати.
Во Општина Радовиш, пожарот кај селото Калугерци зафатил ниска вегетација и контејнер, но е изгаснат.
Во Гостивар, пожарот кај стадионот во населбата Фазанерија, каде што гореле ниска вегетација и ѓубре, исто така е ставен под целосна контрола и изгаснат.
Изгаснат е и пожарот во Општина Неготино, во местото Ило Виларов, каде што горела ниска вегетација.
Во Струшко, пожарот кај Ново Село, каде што била зафатена ниска вегетација, е целосно изгаснат.
Од ЦУК посочуваат дека состојбата со пожарите на отворен простор се следи континуирано и дека надлежните служби се ангажирани на активните жаришта.
Бројот на активни пожари, особено оние што зафаќаат шумски појаси, ниска вегетација и грмушки, укажува дека опасноста од нивно ширење и понатаму останува висока, поради што од надлежните институции се апелира на максимална внимателност и избегнување активности со кои може да се предизвика пожар на отворен простор.